Gagauziya Üüretim Bakannıı geçirdi monitoringı, belli etmää deyni üürenicilerin üürenmäk çıkışlarını 2025-2026 üürenmäk yılın ilk semestrusunda. Analiz yapıldı başlankı,gimnaziya hem liţey klassların üürenicilerin başarıları için,da bütündän bu monitoring gösterdi regionda durumun ii çıkışlarını.
Gagauziyanın üüretmäk sistemasında üürener 15.5 bindän zeedä üürenici hepsi üüretmäk ţiklalarında. Monitoring gösterdi 2025-2026 üürenmäk yılın ilk semestrusunda ii başarları hem orta bilgi kalitesinin uurunu.Bunun için haberledi Gagauziya Üüretim Bakanı Nataliya Kristeva: «Başlankı klasslarda bizdä yok uşak,ani etiştirämeer. Bilgilerin kalitesi -25% taa zeedä.Bu ii.Gimnaziyada üürenmäk uuru kurdu 98% taa zeedä.Bilgilerin kalitesi- yakın 23%.Liţey uurunda — 95% bilgilerin kalitesi.Yakın 19% liţey üürenicileri başardılar ilk semestruyu 10, 9 , 8 notalara, ama bu uurda da 4.5% liţeyistlerdä var borçlar».
Üüretim Bakanın laflarına görä, toplanılmış haberlerä görä lääzım şindiki durumun haliz notlamasını kurmaa hem ileri dooru ilerletmää üüretim proţesini.Bilgilerin kalitesinin kaldırması üüretim sistemasının baş davaaların birisi kalȇr.
«Neçin bizä lääzım bu haberlär? O üzerä,onnar olsunnar deyni ii temel üüretim notalamasında hem gelecek için bilgilerin kalitesinin üüselmesindä.Bu monitoringların neeti –annamaa nesoy üürenerlär büün bizim uşaklar, neredä ii başarlar var, neredä tutturmak lääzım.Da bu haberlerin yardımınnan, biz kararları kablederiz,angıları doorulȇrlar üüretmenin kalitesini kaldırmaa deyni, uşaklara hem üüredicilerä yardım için,hem taa dooru notalamaya.Bizim için bu baş neet»,- haberledi Gagauziya Üüretim Bakanı Nataliya Kristeva.
Urgulanȇr,ani bölä monitoring geçiriler her yıl, ne yardım eder gözletmää çıkışların dinamikasını hem kurmaa sistemni işi regionun üüretim merkezlerindä.