Komrat kasabasında Uşak muzika okulun dolayanını tertipleerlär. Bu yapılȇr onun için, ki okula gelän uşaklar kendilerini raat hem korkunçsuz duysunnar. Bu sokaktan çok maşina geçer yada onnar yol boyunda park edili durȇrlar. Yapının boyunda sa başçalar var, da uşaklara, angıları muzika okuluna gelerlär, maşinaların arasından geçmää sıra geler. Bu problemayı Muzika okulu öndercilii hem analar-bobalar kaldırdılar. Da şindi burada düzüntücülük işleri geçirerlär. Gazon erlerini küçüldüp, brusçatka koyȇrlar, ki uşaklara olsun neredän geçmää.
Bitki yılların süresindä maşinaların sayısı kasaba içindä zeedelendi. Bu elbetki türlü zorluklara getirdi, angılarını mutlak çözmää lääzım, söleer Komrat kasabası Muzika okulu başı D.Timofey: «Maşinadan çıktıynan trotuara geçmää deyni sıra gelärdi gazon üstünä basmaa. Bu üzerä bu işlär geçirilerlär. Da analar-bobalar uşaklarını muzika okuluna getirdiynän raat onnarı burada brakabileceklär. Uşaklar sa korkusuz trotuarda okula gireceklär. Hem pek önemni, ani burası parkovka için kullanılmayacȇk. Burası sadecä yayan gezennär için».
Komrat kasabası Muzika okulu üüredicileri çizgileerlär, ani uşakların korkunçsuzluu — ilk erdä olsun lääzım.
İvan Lülenov çizgileerlär: «Bu yolu aykırlamaa deyni birkaç keret saaya-sola bakmaa lääzım. Burası hatalıydı. Uşaklara zordu burada. Onnar maşinalar arasında gezärdilär. Onnara korkunçsuz koşulları kurmaa deyni sıra geldi gazonu küçültmää da trotuar yapmaa. Butakım uşaklar taa tez yapının yanına geçäbileceklär, maşinalardan taa uzak olacȇklar».
Bu zorlukları çözmää Komradın ȇkonomika agenti A.Valkov yardım eder. Onun yardımcısı M.Leventiy çizgiledi, ani en önemni, ki uşakların saalıına zara olmasın hem onnar kasabanın sokaklarında raat kendilerini duysunnar.
Marina Levintiy, ȇkonomika agentin yardımcısı, çizgiledi: «Bu en ilkin uşakların kurkunçsuzluu. Uşaklar yol üstündä, maşinaların arasında gezmesinnär deyni bu proekt giriştiriler. Uşaklar maşinalardan indiynän dooru yapının girişinä geçäbileceklär».