Moldovada laf gider uşakların koruntusu için internetta. Moldova devletin prezidenti Maya Sandu haberledi cümnä seslemekleri icin, angıları adalı uşakların koruması için ţifra sferasında hem kanona diişilmeklerin karar kabletmesi için. Koyulu plana seslemeklerä çaarmaa ana -bobaları, üüredicileri, psihologları, medikleri hem kiber korumak sferadan uzmannarı.
Soţial baalantıların hem onlayn platformaların hızlı genişlenmesi verer kolaylık diil sade üürenmäk için hem lafetmäk için, ama riskleri peydalattırȇr- kiberbulingtän hem internet çekilmesindän korkunçlu kontendä kadar, haberledi Moldova devletin prezidenti Maya Sandu TV8 kanalın programaların birisindä.
«En ilkin lääzım üüseltmää ana- bobaların bilmesini diil sade o zorluklar için, angıları baalı uşakların bulunmasınnan internetta. Onnarın onlayn vakıdı herzaman büüyer, da çok türlü aaraştırmaklar göstererlär, ani çok vakıt internet kullanması ilişikli saalıın psihika taraflarınnan. Uşaklar olȇrlar susarak, uykuları daalȇr, da onnar pasiv olȇrlar yaşamakta»,- haberledi Moldova devletin prezidenti Maya Sandu.
Devletin başı haberledi, ani taa çou aaraştırmaklardan göstererlär nekadar soţial baalantıları uşakların saalıında negatıv belli olȇrlar.
«Bizdä var statistika, angısı gösterer kahırlı tendenţiyayi — büüyer kendi — kendini öldürmeklerin sayısı hem uşakların aralarında psihika dertleri. Biz göreriz, ani kızlar taa sık karşı gelerlär bu problemalarlan, nekadar çocuklar. Maana çok var, ama ţifra soruşları gün -gündän taa pek belli olȇrlar .Bizim davaamız -yardımnamaa ana- bobalara, neçinki taa çoyu onnardan duyȇrlar baskıyı bu durumdan. Onunştan pek önemni açıkçasına lafetmää bunun için, kaldırarak problemayı hem annatmaa insannara bunun için»,- haberledi Moldova devletin prezidenti Maya Sandu.
Yaşayannar paylaştılar nicä onnar notalȇrlar uşakların korumasını internetta hem da lääzım mı korumak olayları olsunnar.
«Açan uşaklar kullanȇrlar soţial baalantıları hem internedı 10 minuttan taa çok onnar olȇrlar agresiv, hem açan alȇrsın onnardan telefonu. Peydalanȇr agresiya hem da onnar bakȇrlar diil lääzımnı kontentı onnarın yaşlarına görä, angılarını diiil lääzım baksın uşaklar 16 yaşınadan. Onnar paylaşȇrlar bununnan, sora da denerlär hep ölä yapmaa da bu pek prost. Bän sayȇrım, ani uşaklar lääzım baksınnar resim filmnarı yaşlara görä, ama taa büük uşaklar lääzım siiretsinnär faydalı filmneri».
«Ne siz yapacȇnız. Bişey. Uşaklar hep okadar VPN yardımınnan kullanacȇklar onu. Bu 100 proţent. İi nicä siz isteersiniz, hepsindän telefonnarı almaa mı?»
«Halizdän telefonnarı diil islää çok vakıt bakmaa. Bu işä uşaklar çok zaman harcȇȇrlar. Faydalı işlän paylaşmaa var nicä, ama bölä uşaklar pek çok vakıt geçirerlär telefonnarda da onnar olȇrlar sinirli hem onnarı zor olȇr terbietmää».
«Telefonnar lääzım, ama onnarı lääzım vakıda görä kullanmaa. Nicä onu vermemää. Saklı emiş herzaman datlı, bunun için yasak etmää yok nicä. Bän bölä sayȇrım».
«Ko onnar telefon açsınnar da analar- bobalarlan lafetstinnär, neredä onnar bulunȇrlar. Başka hepsi işleri Feysbuktan kapatmaa».
Konsultaţiyaların süresindä pay alacılar yapaceklar analiz büünkü korumak mehanizmalarına uşaklar için da notalaceklar eterli mi kanon normaların işlemesi. Bitki- bitkiya kabledilecek karar nesoy diişilmekleri kanona lääzım geçirmää, ki onlayn platformaların işini kontrol etmää hem internettä uşakları korumaa.
« Biz annȇȇrız, ani heptän uşakları yok nasıl kurtarmaa bütündän onlayn dünnesindän, onuştan bizim davaamız bulmaa real korumak mehanizmaları internetta. Erlim biz bularsaydık kararları , korumak instrumentleri- devlet hazır onnarı açıklamaa hem geliştirmää barabar internet- platformalarlan. Moldova diil büük devlet da bizä zor karışmaa büük kompaniyaların çalışmasına».
Bekleniler, ani hepsi danışmaklar temel gibi olaceklar milli politikada, ki dicital sferasında evlad boylarını korumaa. Kuvetlär urgulȇȇrlar, ani iniţiativanın baş daavası- uşakları kopartmamaa tehologiyalardan, ama kurmaa koşulları, ki internet olsun korkusuz hem faydalı instrument üüretmektä hem ilerlemektä.