Bitki iki aftanın süresindä MD yımırtalar paalılandı. Büük tükennerdä bu malın paası 50 leyä yakın. Komrat panayırında yımırtanın paası 35-45 ley kurȇr.
MD yımırta paası birdän kalktı.Yaşayannar söleerlär, ani bu önemni imäk malın paalılanması onnarı dalgalandırȇr, çünkü o may her gün sofrada bulunsun lääzım. Paalılanmak insannarın aylä büjetindä belli olȇr, en zor ama yaşlı insannara, nışannȇȇrlar yaşayannar.
«Fasılca, ani paalılanȇrlar, başka taraftan ama baktıynan herbir mal büünkü gündä paalılanȇr. Bän satın alȇrım, çünkü bizim yaşımızda yımırta imää lääzım, ama bu paalar cebimizä urȇrlar».
«Şindi pek siirek alȇrım, çünkü pek paalı. Ne yapalım, insannar söleerlär, ani em kuşları büütmää deyni paalı. Hepsi paalı, insana pek zor, kuş büütmää dä zor».
«Alamȇȇrım, çünkü pensiyam sade 3 bin. Şindi harçlar için ödemäk kvitanţiyaları kabledecäm. Var mı nicä 3000-nik pensiyaylan 40-ar leyä yımırta satın almaa?».
«Eer aylä büükseydi yok nicä alsınnar, ama küçüksä, var nicä. Bän birär yımırta gündä iyerim, 10 günä eter».
«Yımırta için düşünmää vakıt yok, ilaca çok para gider, iyeriz ekmek, çorba. Yımırtanın paası 40-45 ley, sanȇrım, ani Evropada bölä paalar diil».
Yımırtanın paalılanması Moldovada baalı diil sade devlet faktorlarınınnan, ama dışankı panayırlan da, nışannadı ANSA kurumun öndercisi Radu Mustäţȇ: «Evropa devletlerin taa çoyu kuş gripi problemasınınnan karşı gelerlär. Paalar orada da kalktılar. İsteerim nışannamaa, ani Moldovanın var hakı “A” kategoriyası yımırtayı Evropaya eksporta çıkarmaa. Biz gireriz dünnenin 6 devleti arasına, angılarında bölä hak var».
Yaşayannar umutlanȇrlar, ani yımırtanın paalılanması hem üüsek paalar uzun vakıtlık olmayaceklar.