Moldovanın Hükümeti avgustun 5-dä belli etti kararı ne baalı Redjep Tayip Ȇrdogan adına Moldo-türk kolecin düzülmesinnän Komratta, ama kurumun açılması baalı çözülmedik soruşlarlan erindeki uurda, söleerlär Üüretim ministerliindä. Minist Dan Perçun bildirdi, ani işi durgudȇr avtonomiyanın kuvetleri, onnar isteerlär ki üüretmäk proţesi rus dilindä geçsin, esaba alarak regionun özelliini, karar üüretmäk formatı olsun devlet dilindä avtonomiyada kullanılan dil esaba alınmadı.
Moldo-türk koleci Komratta artık yapıldı. Onun düzülmesi 2021-ci yılda çeketti, finansladı Türkiye devleti, iş yapıldı TİKA Türk agentstvonun yardımınnan. Üüretmäk kurumunu taa 2024-cü yılda kararladıydılar. Ama açılışı birkaç kerä geçirildi. Şindi Moldovanın Hükümeti Moldo-türk kolecini Rejep Tayıp Ȇrdogan adına inandırdı. Karar verer kolaylıı sıradakı adımı yapmaa: bir vakıda direktoru koymaa, kurumu kanonca sayıya koymaa,çalışannarı belli etmää hem studentleri kabletmäk planını kurmaa. Ama var olan işleri sırasıyca geçirmäk için, yılın çeketmesinädän lääzım tehnik soruşlarını çözmää.
DAN PERÇUN MD üüretim ministrusu
«Gagauziyadan kimi kolegalar bizä işi durgudȇrlar. Onnar isteerlär üüretmäk didli-rus dili olsun».
Üüretim ministrusu söleer, ani rumın dili kolecdä temel üüretmäk dili düşer olsun, çünkü bu yazdırılı Moldova-Türkiye baalantılar protokolunda. Ministr hep ölä belli etti, ani kimi predmetlär var nicä başka dillerdä götürülsünnär. Kolecdä kararlȇȇrlar dört zanaat açmaa: kompyuter setileri, programirovanie hem programa testirovaniyesi, ȇlektromehanika hem ȇlektronika. Her yıl burayı 60 üüreniciyädän kabletmää neetlenerlär. Üüretim ministerliin annaşmasına görä, hazırlık programası yakın 80 proţendä türkiye programasına uyack.
DAN PERÇUN MD üüretim ministrusu
«Bizä deyni önemli Moldovanın devlet dilini kaaviletmää hem bizim vatandaşlara, bakmadaan neredä onnar yaşȇȇrlar hem üürendilär, üüsek uurunda devlet dilini ilerletmää».
Üüretmäk dili – temel sebep oldu Kişinöv hem Komrat kuvetlerin aralarında, çünkü bakışlar burada ayırıldılar. Gagauziya Bakanı teklif eder birkaç dildä üüretmeyi götürmää yada çok dilli bölükleri kurmaa.
Avtonomiya kuvetlerin çıkışı bu soruşta hederlez ayın 29-da postonovleniye proektindä belli etti, neredä teklif ediler üüretmeyi rumın, rus, gagauz hem türk dillerindä geçirmää.
GAGAUZİYA BAKANNIK KOMİTETİ
«Protokola diişmekleri ne baalı üüretmäk dilinnän geliştirmää: esaba almaa türk dilindä üüretmäk olsun, gagauz, rus, devlet dillerindä yada çok dilli grupalarda üüretmäk, da Gagauz avtonomiyasının gençleri moldo-türk kolecindä üürenäbilsinnär».
Üüretim ministerliindä butakım yaklaşımnan kayıla gelmeerlär. Orada çizgileerlär: dil soruşu Moldova-Türkiye aralarında annaşmasında belli edildiydi. Şindiki zamana taraflar annaşmayaya neetli gelmää. Dan Perçun belli eder, ani koleci 2026-cı yılda etiştirämeyeceklär açmaa. Şindi soruş hep taa açık kalȇr: 2027 – ci yılda açaceklar mı, osa enidän datayı geçireceklär.