Açık hava enidän dener çiftçileri sert kuraklıklan. Korumaa deyni booday hem üzüm bereketini, fermerlar lääzim «akıllı» beslemesindä eni tehnologiyaları kullansınnar. Bucak kırlarında haliz kurtarmaa deyni bereketi bir pilot proekti giliştiriler, neetlän kullanmaa bor mikrogübrelerini. Nicä eniliklär köklenerlär üülen topraklarda hem ne söleerlär agrariyalar —bizim reportajımızda.
Riskli çiftçilik zonası — te nasıl üülen Moldovanın agro-klimat koşullarını adlȇrlar uzmannar. Su kıtlıı getirer ona, ani büümnär taa az kablederlär mikroelementleri, en ilkin — boru, ani tutêr kök sistemanın kalkınmasını hem yardım eder çiçek açmaa deyni. Bu problemayı sistemalı çözmää deyni denerlär kulanmaa mikrocübrelerini. Nicä nışannadı ekspert Janna Toporaş, Gagauziyadan 16 çiftçi kurumu katıldılar bu pilot proektinä, ki denesinnär bu tehnalogiyayi praktika içindä.
«Bu tehnologiyaya görä büümnär kendileri için minerallari, vitaminneri alêrlar. Onun kök sistemi pek kaavi olȇr, sapı da kuvvetli olȇr. Bu tehnologiya bizim agrariylarımıza neçin faydalı? Kullanması kolaydır, harcamaklar da azdır, çünkü iki etapta kullanılȇr. Bu sırada hiçbir başka gübre kullanılmêr. Büümneri korumaa deyni başka işlär dilläzım»,- nışannadı ekspert Janna Toporaş.
Çiftçilerin arasından biri , kim korkmêr eksperimentlerdän hem aktiv kullanêr enilikleri praktika içindä — Tvardiţadan tanınmış çiftçi Pavel Paskalov. Onun çorbacılıında adetçä denerlär büümnerin korumasını hem beslemesini eni metodlarlan. Nicä o nışannadı, kuraklık koşullarında eski bakış artık herkerä işlemêr. Büümnerä lääzim tez, doorudan yardım. Borrdan beslemäk malları tez kablediler topraklan, o yardım ederek kulturalara geçmää ekstrimal temperaturaları, korumaa onu hem kurmaa kaliteli toumu.
«Bu tehnologiyanın kullanmasını göreriz bu tarlada. Trala payedili iki paya, sınırı burada. Bu tarafta tarla işlendi gübrelärlän. Toumnar Odessa selektsiyasının, ama araralarında belli ayırılmak nicä gök hem er gibi. Taa dolu başak, kuraklaa dayanıklı. Hem da kuvvetli. Bir tek tarlada durmaa olmaz. Denemelär yapmaa lääzım da bakmaa, angısı taa iyi hem bizim koşullara taa uygun»,- çiftçi Pavel Paskalov nışannadı.
Boday hem oloylu kulturalardan kaarä, borlu kompleksleri göstererlär büük faydalıı başçada hem üzümcülüktä, ne çok önemli üülen regionun ekonomika tarafına deyni. Nicä nışannadı agrar bakanı Sergey İbrişim, şindi pek lääzim desteklemää bu türlü iniţiativaları. Klimat diişiler, hem erli geçmärsak eni tehnalogiyalara, var nasıl kaybetmää konkurenţiyayı. Bizim borcumuz — olmaa baalantı bilim bölümün hem çiftçilerin arasında.
«Biz isteeriz bu tehnologiyayı kendi topraklarımızda da kullanmaa, çünkü o harcamakları azaldacek. En önemlisi da, o bugün çiftçilii bugünkü klimat koşullarına uydurêr. Bu yıl da pek ilginç geçer, çünkü şindi pek sıcaklar var. Bu sıcaklar, bugün büümneri stresa koyȇr. da kullanarak bu tehnologiyayı bizim tarlalarınızda, sora var nasıl görelim halizdän çıkışları»,- nışannadı agrar bakanı Sergey İbrişim.
Bakalım, yardım edäceklär mi bor mikrogübreleri büümnerdä klimat diişilmesindä — bunu göstereceklär toplanmış bereketin sayısı ambarlarda. Ama üülen regionun çiftçileri bilerlär: gelecektä — eni tehnalogiyaların sırası.