Moldovada 2026–2027 üürenmäk yılı için universitetlerdä dokumentleri kabletmäk kampaniyası başladı. Abiturientlär dokumentlerini Avgustun birinädün eadmitere.gov.md platformasında var nasıl versinnär, haberleer MD Üüretmäk ministerlii.
Dokumentleri kabletmäk komissiyaları hepsi universitetlerdä başladı. Onnarın aarasında Komrat Devlet Universiteti da. Büünkü gündä burayı liţey hem kolledj başarannarı dokumentlerini getirerlär. Magistraturaya girmää isteyennär dä dokumentlerini vererlär. KDU rektoru Sergey Zahariya söledi, ani gençlerä deyni ii koşullar üürenmäk için var.
«Neçin KDU? Neçinki biz kendi dolayımızda bulunêrız. Bizdä hepsi zanaatlar akkreditaţiyadan geçti. Üürenmäk dilleri gagauz, moldovan (rumın), rus hem ingliz dillär.».
Dokumentleri kabletmäk kampaniyasının ilk günündä KDU-ya çoyu başarannar ana-bobalarınnan geldilär. Onnar açıkladılar, ani universiteti ayırarkan — evä yakın onun bulunmasına, üürenmäk programasına hem seçilän zanaatına meraklını çok önemniydi.
«Bän ayırdım KDU , neçinki o evä yakın bulunȇr hem burada benim dostlarım da üürendilär. Bän marketing hem logistikaya üürenmää isteerim».
«Bän burada benim dostlarım nasaatlarına görä üürenmää isteerim. Onnar hepsi şükürlü buradan gittilär».
«Bän geldim büün kızımı tutturmaa, ani onda hepsi iicä olsun».
«Bän KDU ayırdım, neçinki o evä yakın bulunȇr hem üüretmäk programmayı beenerim burada, kontrakt parası da ii. Ayırdım ölä uuru, ani yabancı dilleri üürenmää ».
Üürenmeyi ilerlederlär KDU başarannarı da. Onnarın arasında isteyennär magistraturaya dokumentleri vermää da var.
« Bän KDU üürenicisiyim , 3 yıl burada muzika uurunda üürendim.
Burada pek cana yakın üüredicilär, büün da magistraturaya dokumentlerimi vermää isteerim».
«Sanȇrım , ani universiteti hepsi lääzım başarsın. Diplom da hepsindä olsun lääzım».
«Ayırdım genä KDU , neçinki burada üürendim hem steerim üürenmeyi ilerletmää».
«Magistraturaya dokumentleri vermää isteerim. Burada üürenecän, neçinki yakın hem çok zanaata üürenmää var kolaylık ».
«Bän Ukrainadan geldim , da isteerim KDU üürenmää , ki üüredici olmaa».
Universitettä naşannȇȇrlar, ani dokumentleri verärken üürenmäk için dokumentleri hem lääzım olan başka kiyatları hazırlamaa ilerdän lääzım.
GEORGİY SULT üürenmäk işleri rektor yardımcısı
«Registraţiya için bakalavr yada kollej diplomu lääzım olacek. Eer başarannarı kabledärseydilär , ozaman özel dokumentlerini başarannara geeri vereceklär».
Dokumentleri universitetä vermää İyülün 27-dän Avgustun 1- nädän eadmitere.gov.md platformasında onlayn vermää kolaylık olacek. Universitedä kabletmäk ilk çıkışları Avgustun 8 –dä belli olaceklar .