2025-ci yılda Moldovaya gelän turistlerin sayısı zeedelendi. Onnardan kaarä Moldova turizm erlerininnän vatandaşlar  taa da sık meraklanmaa başladılar. Bu haberleri açıkladı ekonomika uurunda ekspert Väçeslav İoniţȇ. Kendi analizinnän o gösterer, ani 2025-ci yıl Moldova turizm sektorunda eni uurlara çıkȇr.

2025 -ci yılın ceviz ayınadan MD turizm kurumnarı 252 bin insana devletimizdä turistik erlerini dolaşmaa kolaylık verdilär, nışannadı ekonomika uurunda uzman Väçeslav İoniţȇ: «Yılın 3-cü kvartalında sayılar bi̇rdän zeedelndi̇lär da kurdular 252 bi̇n i̇nsan. Bölä sayılar şindiyadan yoktur oldular. Bütün yılda bu sayı 585 bin insan kurȇr, geçän yıl 556 bindi. Başka taraftan aşırıya çıkan moldovannarın sayısı stabil kalȇr, 397 bin 2024-cüdä hem 398 bin 2025-ci yılın üçüncü kavartal sonunda».

Espertin laflarına görä, 2025-ci yılın sonunadan devlet turizması uurunu kullanan insannarın sayısı istoriya sayılarına etişsin yakışȇr.

«Devlet turizması, angısı yıllar boyunca 50 biinnik turist uurunda bulunardı, birdän zeedelenmää başladı. Üçüncü kvartalda devlet turizması sayısı 187 bin insan kurdu, onnarın arasında 82 bin insan başka devletlerdän geldilär, 105 bin dä Moldova vatandaşları. Yılın sonunadan bu sayı 200 binädän zeedelensin yakışȇr»,-  dedi ekspert.

Turistlerin 85 %-di Rumuniyadan, İtaliyadan, Ukrainadan, Almaniyadan hem Amerikadan gelerlär. Gagauziya yaşayannarı annattılar bizä, angı devletlerä onnar turist olarak giderlär hem angı erleri Moldovada ayırȇrlar.

«Bän severim taa sık aşırıya gitmää, orada ayırı bir atmosfera var. Burada biz herzaman bulunȇrız, onuştan biraz diişiklik isteeriz».

«Bu yıl Türkiyeyä gittik, pek gözäl devlet, pek beendim. Siirek çıkȇrız, olsa taa sık çıkmaa».

«Bän erli turizmayı severim, aşırıya pek siirek giderim, burada üürenerim. Vardır gittiim Sorokaya, Belţi kasabasına».

«Taa sık Rumuniyaya giderim, Yassı kasabasının gözelliklerini pek severim».

«Vardır gittim Moldovanın poyraz tarafına, Kişinövda da var gözäl gezi erleri. Şindi pek çıkmȇȇrız, gelirlerimiz pek küçük. Makar Moldovada bulunan erleri gezmää kolayımız yok. Taa zenginnär beki yakışȇrlar gezsinnär, ama bizim kolayımız yok».

«Bizdä Moldovada pek çok gözäl er var. Güç, ama yaşayannarın taa çoyu onnar için bilmeerlär. Sayȇrım, ani lääzım taa çok videoları kurmaa, ki insan en ilkin internettä bu erleri görsün, sora da orayı gitmää istesin. Biz Moldovaya pek sık gezeriz».

«Hiç bireri gitmeerim».

«Bän dinnenmeerim, hiç bir sıra bireri yoktur çıktım. Kolaylıım yok. Vardır gittim sade Hınku manastırinä hem Komradın karı manastırinä».

«Güç, ama bän yaşamamda dinnenmää yoktur çıktım. Ne vakıt, ne dä kolaylık bu işä yok».

«Güç, ama Moldovada yoktur bireri gittim. Taa çok devlet aşırı dinnenmää isteerim».

Väçeslav İoniţȇ nışannȇȇr, ani devlet gezilerinä merak zeedelener.  Moldova yavaş-yavaş kendi turistik brendini kurȇr, angısı natura gözelliinä, kulturaya hem musaafircilää temellener.  Devlet içi turizması olȇr ölä bir uur, angısı verer kolaylık yaşayannara enidän kendilerinä deyni Moldovayı açmaa.