Komratta paalandı marşrut taksilerdä gezmäk. Karar tarif bakılması için kabledildi muniţipal nasaatınnan ondan sora nicä götürücülär danıştılar onnara. Üüselmesinin baş sebepinnän oldular harçların büülmesi hem dizel yakacaan paaların kalkması. Primariyada nışannȇȇrlar, ani paa kalkması baalı lääzımnıklan korumaa kasaba marşrutların işini.
Tarif kalkmasını Komrat kasabasının yaşayannarı şansora duydular, angıları hergün kasaba marşrutlarda gezerlär. Onnara gezmenin paası beklenän oldu, bakarak başka işlerin paalanmasına, başkaları için bu aylä bücetinä bir ük.
«Annȇȇrım, ani Moldova kaldırdı paaları yakacaa da bunun için bölä paalar. Ne yapmaa. Kişinövda pensionerlär parasız gezerlär nicä bän bilerim. Umutlanȇrız, ani taa ii olacek».
«İnsan gelsin lääzım 7 ley, geeri gitsin taa edi ley. O düşenecek gezmää yada gezmemää. Poliklinikaya her gün gezerim da harcȇȇrım her gün. Pensionerlara yardım olsun lääızm, transport parasız olsun hem paalar pensionerlar için paalar taa küçük olsunnar».
«Bän siirek transpordu kullanerım neçin ki yayan gezerim, pensionerlara zor. Elbetki bu pensionerlara zor. Poliklinikaya iki keret gündä lääızm gelmää, asma pensiyalar küçük da bu diil real».
«Annerız şoferları, bölä yaşamak».
«Yapsınnar pensionerlar için bir ayına dokumenti gezmää deyni».
«Bän kandi maşınada gezerim, ani hep okadar paalı».
Komrat kasaba primarın yardımcısı Viktor Baldji nışannadı, ani danışmak kasaba marşrut taksi gezmesindä tariflerin bakılması için geldi primariyaya götürücülerdän. Onun laflarına görä soruş çıkarıldı muniţipal sovetin oturuşuna bakmaya. Baş argumentlan tarif kaldırmasında oldu yakacaa harçların zeedelenmesi.
«Muniţipal soveti tutturdu bu bildirimi. Götürücülerin baş maanası o ani paalar yakacaa kalktılar da bu baş sebeplän oldu. Bän nekadar bilerim, eer paalar geeri döneceklär yada düşeceklär muniţipal soveti marşrut paalarını enidän bakacek»,- Viktor Baldji nışannadı.
Kaaviledilmiş tariflerä görä pasajirlar için 12 yaşından taa büük gezmäk paası 7 ley kurer, uşakalr için 7 yaşından 12 yaşınadan – beş ley, ama uşaklar için 7 yaşınadan gezmäk parasız. Nicä nışanandılar primariya temsilcileri yakacaan panayırında durumun diişilmesi olarsa ozaman enidän bakılacek gezmenin paası da.