Hızlı medik yardımın, ateş sündürücü izmetin hem poliţiya maşınalara sık keret sıra geler birkaç minudun içindä olayın erinä kadar etişmää. Ama transpordun yollarda kalabalıı hem şoferların açıkgöz olmaması zorladȇrlar bu izmetlerin gelmesini olayın erinä. Var ölä şoferlar da, angıları yol vermeerlär yada yapȇrlar bunu pek geç. Bunun için altı günün içindä poliţiya imetçileri bütünnä devlettä gözledeceklär nicä şoferlar esap alȇrlar maasuz signallarlan transportun yollarda gezmesini, annattı poliţiya uzmanı Andrey Dimitroglo.
ANDREY DİMİTROGLO poliţiya uzmanı
«Sentäbrinin 15-şindän 20-sinä kadar Girofar operaţiyası geçirlener. Onun süresindä poliţiya belli edecek o şoferları angıları tamannamȇȇrlar yol kuralların 106-ci punktunu. Ona görä şoferlar lääzım yol versinnär maasuz transporda tutuşturulmuş signallarlan- ölä nicä poliţiya, medik izmeti hem kurtarıcılar. Operaţiyanın neeti üüseltmää yol gezmesinin koruntuluunu hem da yok etmää avariyaları. Bundan kaare aazaltmaa vakıdı maasuz transpordun gelmesi için olayın erinä.»
Operaţiyanın süresindä inspektorlar durgudȇrlar şoferları, angıları kuralları bozȇrlar, annadȇrlar onnara, nicä lääzım kendilerini yolda dooru getirmää. Şoferların birisi söledi, ani o vakıt, açan maasuz signallarlan maşına yaklaştı o birdän onu esap almadı.
« Bän kayıl olȇrım, ani yol kuralları bozdum, makar ki da saa tafaından şafakları yaktım. Bana geldi, ani bän sansın medik maşınasını kolverdim. Bu gibi transporda hiç bir lafsız lääzım yol vermää. Ama ne yapmaa ölä oldu. »
Maasuz signalarlan transporda, angısı kurtarmaa misiyasınnan yola çıktı, şoferlar lääzım yol versinnär. Poliţiyada haberleerlär, ani vakıtçasına yolun vermesi o insannarın yaşamasının taa hızlı kurtarılması. Bununnan barabar poliţiya izmetçileri söleerlär, ani yolu vermäk — bu diil birdän birä durgunmak yada şüpeli manövra yapmak. Şofer lääzım ayırsın ki enikunu yolun kenarına çekilmää da brakmaa maasuz transport geçsin, söleer Andrey Dimitroglo.
ANDREY DİMİTROGLO poliţiya uzmanı
«Şoferlar, angıları vermeyeceklär yol maasuz signallarlan transporda, cuvaplaa çaarılacekalr, onnara karşı protokol yazılacek, 705 leydän 900 leya kadar ceza konulacek hem 4 ştraf balı verilecek.»
Herbir signal ardında insana yardım lääzım olması. Da ona nekadar hızlı maşına gelecek insanın saalıı hem yaşaması baalı. Bölä operaţiyalar şoferları taa açıkgöz hem cuvaplı yapȇrlar , söleerlär şoferlar.
«Pek lääzım, neçinki hızlı medik yardımı lääzım ilk gelsin, insanın yaşamasını kurtarsın. Bän kuralları savaşȇrım tamannamaa da bölä transpordu kolvermää. »
« Biz lääzım kolverelim, açan bölä transport geçer poliţiya kurtarıcılar ,mediklär. Onnarı herzaman lääzım kolvermää. Bu bizim şofer borcumnuz.»
«Maasuz transpordu kolvermää lääzım. Nicä medikleri, ölä başkaları da.»
«Zerä onnar alatlȇȇrlar insana yardım vermää».
«Herzaman lääzım maasuz signallarlan transporda kurallara görä yol vermää da bir tarafa çekilmää. Bunu herzaman lääzım yapmaa beklämeyeräk bölä olayları. İnsana bekim yardım lääzım.»
Girofar operaţiyası geçirlener bütün Moldovada. Onun baş daavası üüseltmää yol gezmesinin koruntuluunu hem da yok etmää avariyaları.
ANDREY DİMİTROGLO poliţiya uzmanı
«Bu operaţiya geçiriler şoferları taa cuvaplı yapmaa. O faydalı neçinki biz göreriz, ani şoferlar yol vererlär maasuz signallarlan maşınalara. Taa aaz yol kuralların bozulması oldu. Maasuz maşınalar taa hızlı hatalı olayların erlerinä etişerlär.»
Poliţiya danışȇr şoferlara açıkgöz olsunnar hem kuralları tamannsınnar kurtarcıların maşınaları vakıdında olayların erinä etişäbilsinnär. Yolda birkaç sekundaya duruklanması var nasıl yardımsız insanı braksın.