«Lafet gagauzça – 5» — yarışmasının çıkışları yapıldılar. Bu yıl yarışmaya 60 uşaktan zeedä katıldılar hem yarışmak halklararası uuruna çıktı.
Kazayak küüyündä yaşayan Kılçık aylesindä gagauz dili ön planda bulunȇr. Kardaş kızkardaş Arif hem Sevin «Lafet gagauzça» yarışmasına 5 yıl sıravardı katılȇrlar. Uşakların anası Olga nışannȇȇr, ani sevgi Ana dilinä ana-bobadan çekiler.
«Burayı toplandılar büün gagauz dilini, sevän analar hem bobalar. Ana dilimizi sevän uşaklar. Uşakların sevgisi Ana dilinä, elbetki geler Anadan, bobadan. Onun için bän büün kutlȇȇrım ana-bobaları, angılarının çetin harakter tabeeti var kullanmaa hem uşaklara vermää, ilerletmää gagauz dilini»,- Olga nışannadı.
«Lafet gagauzça- 5» yarışmasına bu yıl katıldılar diil sade Gagauziyadan uşaklar, ama Russiyada yaşayan türk dilli milletlerin evladları da, nışannadı yarışmanın kurucusu Güllü Karanfil: «Biz çalıştık maksimum bulmaa te o uşakları, kim lafeder. Ama ne yazık ki burada da göreriz, ani arada-sırada analar uşaklarınnan rusça lafetmää artık alışmışlar. Sanȇrım, ani bu uşakların sayısı lääzım zeedelensin. Hem taa bir iş isteerim sölemää.Bu yıl akţiya halklararası oldu. Onun adını koyduk «Türkçä sölä». Neçin deyni Russiyada yaşayan türk halkların da dilleri kaybeler. Akţiyaya katıldılar krım tatarları, kara çaylılar, balkarlar,kumuklar, yakutlar hem sibir tatarları. Bütüdän 85 uşak akţiyaya katıldılar».
85 uşaan arasından 40-kı gagauz ayleleri uşaklarıydılar. Onnarın arasından seçildilär 30, onnar, kim ayledä gagauz dilindä lafeder. Herbir uşak ödüllendi hem baaşışlandı. Destek bu uura Türkiye devleti dostlardan geldi.
Kenan Sübekçi, Türkiye devleti Gümüşova belidiyesi başkanı,nışannadı: «Burada öz türçenin konuşulduunu görmäk, bizi mutlu etti.Biz da bu proektä gagauz uşaklarını gelecektä dillerini ilerletmesi için elimizdän gelenini küçük destektä bulunmak istedik. Gagauzlara kendi uşaklarına dillerini vermesini hem hergün kullanmasını yalvarȇrım, çünkü insanın Ana dilindä kunuşması pek gözäl».
Ali İnan, Türk Dünnesi dostu, nışannadı: «Sadece gagauzçanın son derece düzgün kunuşmasını istiyorum. Arada başka dil olmasın. Dilini kaybedän milletrlär, dilini hem kimniini dä kaybedärlär. Bu sebeptän gagauzçayı korusunnar».
Yarışmanın kurucusu nışannadı, ani bu olay verdi kolaylık diil sade en iilerini ayırmaa, ama başkalarına da gagauz dilini üürenmää hem gagauzça lafetmää ihlam vermää.