Çadır kasabasının profesional uçilişesindä geçti KVN konkursu — şaka hem yaradıcılık yortusu. Burada pay aldılar studentlär, Kim ilk kursta bu yıl üürener. 7 komanda kendi becermeklerini gösterdi – «Professiyaya girmäk» oyunun temasıydı.
Konkurs başladı selämnamaktan. Komandalar sţenaya çıktar girgin hem sigur, açıklayıp talantlarını. Herbir nomer — ayırı bir istoriya student yaşaması için.
«Benim duygularım pek şen, neçinki bän açıldım bu insannara, angıları uçilişedä var. Burayı geldim üürenmää, neçinki isteerim ölä zanaat olsun, angısı bana lääzım olacek yaşamamda, bän zanaata görä işleyecäm».
Konkursun ikinci êtapı — evdeki iş. Burada ilk kursun studentleri lääzımdı açıklasınnar kendi profesiyasının ii hem kötü tarafarını. Siiredicilär pek şen karşıladılar herbir komandayı.
«Biz pek sevineriz, ani yaptılar bölä iş,derindän hazırlandık buna».
Konkursun üçüncü payı — yaradıcılıklan baalıydı. Şen Oyunnar, gözäl türkülär sţenadan öttülär. Bütün oyunu siirettilär jüri azaları. Herbir komandaya notalar koyuldular . Svetlana Ormanji içindeki kalitä komisiyanın başı söledi, ani KVN artık oldu ii bir adet uçilişedä.
«Geçireriz KVN konkursunu. Sevineriz, ani usaklar büük havezlän katılêrlar, pay alêrlar. Bakmayarak, ani onnar taa genç, pek islää uurda hazırlanmışlar»,- Svetlana Ormanji söledi.
Jürinin notalamasına görä ilk eri kazandı Metamorfozı komandası. Pay alannara verildilär gramotalar hem para premiyaları.