KDU kvest finans dünnesindä geçti. Toplantı Gagauziya Üüsek okulunda beşinci sıra geçer. Kim pay aldı kvestta bu yıl, üürendi Polina Barbova.
2026 – ci yılda kvest finans dünnesindä pay aldılar 80 – dän zeedä KDU ȇkonomika fakultetin studentleri hem da liţeyistlär bütünnä Gagauziyadan, haberledi KDU karyera merkezi öndercisi İnna Zlatovçenа: «İlktän bu toplantının neeti dooruduluydu, tanıştırmaa liţeyistleri bizim Üüsek okulun işinnän, göstermää bizim universitetin kolaylıklarını, hem yapmaa ölä, ki onnar sevsinnär onu hem da ayırınnar bizim okulu».
İlk sıra bu yıl kvestta pay alȇrlar üürenicilär Kıpçak küüyün S.Baranovskiy adına liţeyindän 12 klasın üürenicileri. Liţeyin fizika üüredicisi Georgiy Kopuşu, angısı geldi tutturma kendi üürenicilerini, çizgiledi, ani bu kvest olacek islää ders gibi diil sade üürenicilär için.
«Bän burada ilk sıra bulunȇrım üürenicilärlän, onun için, bu kvest diil sade üürenicilär için, ama benim için kendim için da. Geldik burayı neetlän kazanmaa ilk erleri, göstermää islä becermeklerimizi, uurumuzu. Umutlanȇrız, ani hepsi islä olacek»,- Georgiy Kopuşu çizgiledi.
Konkursun pay alannarı nışannadılar, ani bölä uurda toplantılar işlettirerlär düşünmeyı, logikayı hem da analitik düşünmeklerini. Yarışçıların aralarında vardılar diil sade eni pay alannar, ama öleleri dä, angıları pay aldılar taa ilerki yıllar.
«Bana deyni nicä studenta bu kvest pek meraklıydı onunnan, ani vardı neysa eni, belli etmää kendini neda sä enidä, da annamaa nekadar sana deyni bu meraklı».
«Bekleerim şennik, neysä eni, taa zeedä sa beklerim tanışmaa burada eni dostlarlan».
«Meraklı konkursları, şen vakıdı geçirmää kolegalarımnan hem 12 klaslan. Bölä uurda toplantıları sayȇrım, ani var nasıl taa sık geçirmää, neçinki studetlerä olacek meraklı bulunmaa derslerdä hem da vakıdı geçirmää kafadarlarınnan».
« Büünkü kwestan bän bekleerim sade islä duyguları kendim için hem nesä eni üürenmää. Bunu en pek bän bekleerim».
KDU sayı hem finans kafedranın başı, ȇkonomika bilgileri doktoru, hep o konkursun kurucusu Mariya Karabet çizgiledi, ani heryılkı kvest toplȇȇr diil sade KDU studentlerini türlü toplantılara gençlär için, ama koledjlerın üürenicilerini.
«Savaşȇrız toplamaa gençleri bölä intellektual toplantılarda. Oyun doorudulu gelecä abiturietlär için, üürenicilär için hem da kolejlerin üürenicilerinä. Ama bunda, olsun deyni onnara taa kolay bizım komandalara ilk kursun studentlerini katȇrız, ki olsun onnara taa uygun hem yakışıklı burada»,- Mariya Karabet çizgiledi.
Kvest — bu diil sade aaraştırmak. Proţes onda, ki kabledilmiş iştän hem da ileri dooru geçtiktän sora ȇtapların aaraştırmaklrını, angıları verelär kolaylık toplamaa lääzımnı işleri, yapmak için ileri dooru koyulmuş ilktän davayı.