2026 yılın Fevralin 10 GHT temsilcileri geçirdilär iş buluşmayı Moldovanın MSK baalı deputat seçimnerin kurmasınnan. Buluşmakta pay aldılar GHT başı işini götürän N.Ormanjı, deputatlar V.Kıssa hem A.Dülger. Moldovanın MSK tarafından- kurumun başın yardımcısı — Pavel Postikȇ. Buluşmakta bakıldılar kolaylıklar baalı şindiki hak durumunnan hem gösterdilär kayıllıını illerletmää dialogu avtonomiyanın vatandaşların seçim hakları tutturmaa deyni ,alarak esaba milli kanonnarı hem regional speţipikayı.Bundan kaarä,taa bakıldı instituţional iş gruppasının kurmasında ideyası, normativ dokumentlerä analiz hem garmonizaţiya yapmak için.
Avtonomiyanın tarafından buluşmanın pay alannarı ii totaladılar onu. GHT deputatı V.Kıssa urguladı «Общественный интерес» programasında,ani taraflar baktılar çoyu aspektleri,ama bitki karara bu uurda gelmedilär- dialog geçti konsultaţiya hem iş uurunda.
Vladimir Kıssa GHT deputatı: «Dooru yaklaşmak duruma, biz lääzım taa ilkindän annaşalım, angı kompromisslara biz lääzım gidelim, nesoy brakılmaklar lääzım olsunnar Kişinövun tarafından, kanona görä deyni geçirmää seçimneri.Ama diil ilkindän ayırmaa MSK azalarını,sora da davaa dartışmakları peydalansınnar,hem yasak edilsinnär seçimnär.Bu olmasın deyni,biz geçirdik ii buluşmayı, bizi sesledilär, biz teklif ettik kendi variantlarımızı».
Moldovanın MSK nışannȇȇrlar,ani dialog Gagauziyaylan –durumdan çıkışın baş elementi. Moldovanın MSK başın yardımcısı Pavel Postikȇ nışannadı,ani sade açık lafetmeklerdä hem hak koordinaţiyasında var nicä bulmaa kanona görä kararları.
«Bir dä kapu açılmȇȇr,ona urmayınca.Başka türlü sölediynän: biz lafetmärsäk,bulamayacez cuvapları o soruşlara,angıları bizdä var.Çıkarak bundan, bän herzaman tutturardım herbir dialogu, herbir taraflan. Bizdä var tehnik tarafı,ani GHT,istärsäydi da diiştirmää, diiştirämeyecek normativ aktları da onuştan lääzım aaramaa çıkışı hem kanona görä kararı,bu problemalar belli olsunnar hem çözülsünnär»,- Pavel Postikȇ nışannadı.
Dialogun önemlisini avtonomiyanın hem orta kuvetlerin arasında urguladı fevralin 11-dä prezident Maya Sandu kendi vizitın vakıdında.Devletin başı nışannadı,ani sade birleşik kuvetlär var nicä tutsunnar demokratiya prinţiplarını da getirsinnär devletin hepsi vatandaşların ii geleceenä.
«Yakın zamanda,Gagauziyanın yaşayannarı ayıraceklar GHT kendi temsiclilerini.Bu insannar lääzım getirsinnän çok beklenän diişmeklerä,angıları lääzım olsunnar Gagauziyanın yaşayannarında –bu illerlemäk, iilik, usluluk hem dialog.Gelecek kendibaşına gelmeer, o kurulȇr dialoglar hem işbirlik aşırı,da kurulȇr dooru yollan»,- urguladı prezident Maya Sandu.
Ekspertlär nışannȇȇrlar,ani dialog –dooru adım. Hak doktoru İ.Yanak urguladı,ani lafetmeklär orta kuvetlerin hem regionun kuvetlerin aralarında lääzım olsunnar diil kimär keret duruma görä,ama herzaman hem konstruktiv,bölä krizislär tekrar olmasınnar deyni gelecektä.
«Büünkü günü dialog lääzım olsun,bän düşünerim.Sayȇrım,ani Gagauziyada lääzım korunsunnar hepsi kuvet institutları,büünkü günü herbir problema var nicä çözülsün. Hak dartışması da olaceydı ii, toplansınnar deyni hepsi üristlär Gagauziyanın tarafından hem merkezdän da çözsünnär soruşları»,- İgor Yanak urguladı.
Büünkü günü GHT seçimnerin soruşu açık kalȇr.Moldovanın MSK haberlerinä görä , üridik soruşları çözülmeyincä, seçimnerin hazırlanmasını yok nicä geçirmää.