Valkaneş kasabasında başarmak uurunda bulunȇr erindeki Kultura evin rekonstrukţiyası. Proekt çeketti 2024-cü yılda da bütündän kapladı yapının enilenmesini hem yakında bulunan teritoriyayı. Ama TİKA yardımınnan siiretmäk zalı kabletti zamandaş tertipleri.
Kultura evi Valkaneş kasabasında hazırlanȇr açmaa kendi kapularını. Yapının rekonstrukţiyası, angısı yapıldı 1960-ci yıllarda da görmedi kapital remondu 50 yıldan zeedä. Proekt çeketti 2024-cü yılın may ayında Gagauziya regional ilerlemäk agenstvosunun yardımınnan, annattı Valkaneş primarı Nikolay Posmak.
NİKOLAY POSMAK Valkaneş kasaba primarı
“Bizim kultura evimiz diişildi. Kasaba yaşayannarı çoktan istärdilär hem bekläärdilär hem bekleerlär nezaman biz açacez hem ilk kultura olayları geçirecez, angıları çoktan lääzımdılar geçirilsinnär bu yapıda.”
Sţena hem siiretmäk zalanın tertiplerin almasında yardımcı oldular partnörlar TİKA agentstvosundan. Primarın laflarına görä ofiţial açılmasınadan kalȇr yapmaa tehnik işleri.
NİKOLAY POSMAK Valkaneş kasaba primarı
“Sţena koyuldu hem oturmak erlär. Orada biraz iş kaldı ne baalı yangına karşı koşullarlan. Bän düşünerim, ani gelän vakıtta obyekt kullanmaya verilecek. Bän yok nicä söleyim nezaman, ama tezlä.”
Yapının kapital remondun hem tertioriya tertiplemesinin paası kurȇr yakın 14-15 million ley. Finanslar verildilär regional hem erindeki ilerlemesindä milli fondundan barabar Gagauziya Bakannık komitetinnän yakın birbuçuk million ley.
NİKOLAY POSMAK Valkaneş kasaba primarı
“İçindeki kapital remondu hem dışansı teritoriya tertiplemesi- 95-97 proţendä hazır.”
Konkret dataları kasaba kuvetleri sölämeerlär, neçinki boşuna adamakları istämeerlär yapmaa. Hepsi üridik hem tehnik proţeduraları proektä görä neetlerlär yılın sonunadan yapmaa.