Noyabr ayın ikisindä Kongaz küüyü «Masaik» programasına görä kabletti musaafirleri Zırneşt kasabasından Kagul dolayından. Buluşmanın süresindä musaafirleri tanıştırdalar neylän büün yaşȇȇr küüyü, onun meraklı erlerinnän hem insannarınnan. Geçirdilär master-klasları hem konţert programmasını hazırladılar.
Musaafirleri karşıladılar tuzlan ekmeklän hem halk oyunnarınnan primariyanın önündä. Kongaz küüyün primarı Mahail Esir tanıttırdı musaafirleri küüyün istoriyasınnan, ilerlemesinnän, urguladı, ani bölä buluşmalar pek lääzımnı.
«Sadece ii duygular, paylaşacez becermeklärlän, neçinki herbirindä var nesä eni, ii, ne var nasıl bizdä alalım, üürenelim. Bakmadaan ona, ani Zırneşt küüyü küçük, ama bu regionun var kendi gözellikleri, biz dä onnara göstereriz Gagauziyayı. Onun için tanıştıracez biri birimizi bizim kulturaylan hem adetlerimizlän»,- dedi primar.
Zırneşt küüyün primarı Nikolay Beju şükür etti musaafirleri sıcak karşılamak için hem nışannadı, ani aftadan sora bekleer onnarı kendi küüyündä.
«Teklif ettilär bizi pay almaa bu Mosaik proektindä. İlktän bizä teklif ettilär Taraklı dolayından küüyü, ama biz istedik maasuz Kongazlan buluşmaa. Da istedik bizä diiştirsinnär, telefon açtık, da sorduk isteerlär mi onnar pay almaa. Onnar kayıl oldular. Biz primarlan beş yıl tanışȇrız»,- Nikolay Beju dedi.
Oluş geçirildi «Mosak» programmasına görä , neredä insannar türlü milletlerdän tanışȇrlar başka kulturaylan, adetlärlän, paylaşȇrlar eni becermeklärlän üürenmäk uurunda, sport hem başka. Milletlär arası baalantılarında agenstvosunun başı Väçeslav Räbçinskiy urguladı , ani önemni üürenmää hem korumaa Moldovayı, onun adetlerini , insannarını.
«Biz sevineriz, ani programmanın pay alannarı taa çok olȇrlar yaşamak erlerin devletin poyraz, merkez hem üülen tarafından. Becermek gösterdi ani her bir küüyün var kendi gözlelli, kendi meraklıı. da biz lääzım üürenelim biri-birindän ilerletmää bizim yaşamak erlerimizi»,- Väçeslav Räbçinskiy urguladı.
Vizitin süresindä musaafirlär tanıştılar moldo-türk liţeyın , ikinci uşak başçanın, sport okulun işinnän. Üürenmäk kurumnarın başları annattılar nicä çalışerlar, nesoy koşullar kurulu uşaklara deyni hem nesoy metidikalara görä üürederlär. Hep ölä annattılar hem gösterdilär kolaylıksız uşaklara deyni merkezi. Nicä urguladılar Zırneşt küüyün yaşayannarı bölä buşuşmalar vererlär kolaylık dostlaşmaa, üürenmää taa yakın biri-birinin kulturalarını, adetlerini.
«Biz geldik Kongaza paylaşmaa becermeklerimizlän. Bün bilerim küüyü çoktan, burada pek ii insannar, talantlı. Nicä söledi sizin primarınız, biz taa bizim moldovamızı bilmeeriz, sölärkana başka devletlär için».
«Bu pek meraklı buluşmak, bakacez nicä olacek bitkiyadan. Şindi pek ii».
«Düşünerim ani bunu çoktan lääzımdı yapmaa. Çok saol sizä ani bizä çok işlär gösterdiniz bu küüdä. İi liţey, uşak başçası. İnsannar kablederlär, kolektivlär karşılerlar».
«Kablettilär nicä kendilerini. Bölä buluşmalar yardım ederlär biri birimizi taa yakın üürenmää, nicä yaşȇrlar dolay küülerä insannar».
Kongaz küüyün insannarı urguladılar, ani lääzım bir devlettä yaşamaa uslulukta, taa sık buşulmaa hem üürenmää nicä başka külerdäda yaşȇrlar insannar. Hep bu gün geçirildi master klaslar, diskisiyalar nicä ilerletmää var nicä küüleri hem konţert hazırlandı.