Kış — en önemni vakıt kuancılıkta. Maasus bu zaman koyulȇr gelecek sezonun temeli. Bizim televizion gruppamız bulundu Andrey Mihnanın kuannıında hem üürendi nicä kuannar geçirerlär kışı hen nesoy geçän yıl başarlandı kuancılara.
Andrey Mihnada var 100 hotul . Kış zamanı en önemni- ki kuannar olsunnar uslulukta, korunsunlar ayazlardan hem hotulda olsun lääzımnı sayıda imekleri. Nicä urguladı kuancı, kuannara en önemni kiş vakıdı- sussuzluk hem stabil temperatura.
«Maasus kışın pek önemni, ki olmasın lüzgär, ki onnarda olsun kuru, ventiläţiya hotullarda, bän bu işleri çok yıllar üürendim. Eer kuruysa, varsa imek ozaman yalä da kavi olacek, zorlukları da onnar taa ilin geçirecek»,- Andrey nışanȇȇr.
Geçan sezon diildi kolay, çünkü ilkyaz suuktu, da çoyu fidannar geç açtılar, söleer Andrey Mihna. Hava koşulların beterinä kuancılar topladılar ta az bal nekadar plannadılar.
«Biz şindiyadan satȇrız bal, çünkü yıl yıla benzämeer, var açan çok bal var açan aaz. Bu yıl yoktu salkım balı, nica biz onu bileriz, pak bal salkım yoktu. Biz çıkardık 30 proţent o baldan, angısını plannadıydık, hem topladılar kuannar, semiçka balı da aazdı. Neçinki pek sıcaktı hem problema ani ekerlär giridları. Bütündän herbir balda etişmedi 50 proţent minimum, akaţıya 100 proţenda, 90 proţenda hem başka»,- urguladı kuancı.
Nicä söleеrlär kuannarın çalışmak vakıdı çekeder ilkyazın da başarılȇr yazın sonunda, amma kuncıda vakıt dinenmää pek az, çünkü kışın lääzım hazırlamaa eni ramkaları, hotulları hem başka avadanlıkları. Eni sezonda bizim kahraman netlener zeedeletmää kuannarın aylesini 100 — 150 dan.
«Kuancı çalışmer bütün yıl, var biraz dinnenmää deyni vakıt. Biz kışın hazırlȇrız hotulları, başka işleri. Eskileri düzmää, eni almaa para pek yok. Çoyu işleri düzmäk tarafından savaşȇrız kendimiz yapmaa. Kışlamak bu önemni ȇtap kuanna deyni. Ondan nicä ii geçireceklär suukları kuannar , belli olacek balın sayısıda»,- urguladı kuancı.
Kışlamak — önemni vakıt kuancılıın yaşamasında. Ondan nekadar ii kışı geçireceklär kuannar, çekiler balın gelecek bereketi. Kuancılar umutlan bakȇrlar gelecek ilkyaz hem yaz vakıdına da hazırlanȇrlar açan onnarın kanatlı böcekleri başlayaceklar uţup bal toplamaa.