Komratta Olimpik akıntısı hem sport günü yortusunu nışannadılar. Merkez stadionunda sportçular, trenerlar, sport şkolalarının üürenicileri hem avtonomiyanın insannarı toplandı, onnar türlü sport çeşitlerindä yarıştılar.
Olimpik akıntı günü her yıl sportçuları hem saalıklı yaşamayı götürän yaşayannarı birleştirer. Komrat için bu bayram artık ii bir adet oldu, o bir meydanda türlü sport okullarını toplêêr. Sport yortusu parattan başladı. Muzıkaylan hem bayraklarlan pay alannar geçtilär stadiondan. Parattan sora ofiţial açılış oldu. Selemlemäk laflarınnan hepsinä danıştı Gençlik hem Sport Bakannıın başın erinä çalışan Pavel Tulba: «Sport – bu sade yarışmalar, medallar hem taramalar diil. Bu karakter, bu kuvet, cevaplık hem disiţiplina. Sportun hatırınnan çocuklar hem gençlär zorlukları geçerlär, koyȇrlar neetleri komandada çalışmaa hem bizim ana tarafımızı üüsek uurda tanıttırmaa. Gagauziya kendi sportçularınnan gururlanêr. Bizim sportçular üüsek uurda devlet hem halklararası yarışmalarda pay alȇrlar. Onnar üüsek hazırlıı, gagauz karakterinin kuvedini hem seçilmiş sporta sevgisini göstererlär».
Gagauziya Bakannık Komiteti başı ilk yardımcısı İlya Uzun urguladı sportçuların önemni rolünü Avtonomiyanın ilerlemesindä, saalıklı yaşamanın bildirtmesini gençlerin aralarında.
«Biz her yıl burada toplanêrız eni taramalara, eni başarlarа, eni isimlerä start vermää, angıları Gagauziya avtonomiyasını hem Moldova Respublikasını temsil edeceklär. Biz gagauz sportunun başarlarınnan, sizin ruh kuvedinizlän hem üüsek taramalarınızlan gururlanêrız. Bän herzaman dedim hem derim: hiç bir insan, hiç bir politik, hiç bir biznesmen gagauz halkının hem bizim avtonomiyanın imedjına sizin kadar çok yapmaz – siz, sportçular hem kultura insanları»,- İlya Uzun urguladı.
Gagauziya Halk Topluşu başı erinä çalışan Nikolay Ormanji sportçuları, trenerleri hem anaları-bobaları yaz sport sezonunun başlamasınnan kutladı.
«Sport – bu sade zanaat diil, sport – bu saalıklı yaşamak. İstäärdim, ki herbir bizim uşaamız sportlan uraşsın, profesional olmasа da, saalıı hem fizik durumunu iileştirmek için»,- Nikolay Ormanji söledi.
Oluşun çerçevesindä sportçuları hem trenerleri üüsek baaşışlarlan ödülledilär. Sportun ilerlemesi için hem uşakların terbietmesi için “Zaamet Şanı” medallär verildi. Ödülleri türlü sport çeşitlerinin temsilcilerinä verdilär. Ofiţial açılıştan sora stadionda yarışmalar başladı. Pay alannar kaçmakta türlü distanţiyalara, ȇstafetada hem girä kaldırmakta yarıştılar.
«Sport yaşamak için önemliydir. Bana kaçmak hoş gelir, çünkü saalıı kaavileştirer hem kendi kuvedini gösterer».
«Sportlan uraşmak lääzım, ki taa pozitiv olasın hem içindä kötü enerji olmasın».
«Bän voleybollan zanaatlanȇrım yaklaşık bir yıl. Sportlan uraşmak önemliydir, çünkü ilk bu saalık, fizik kulturunu geliştirersin, kendi başarlarını gösterersin, gimnaziyamız ilerlesin. Bununnan kendi kuvedini, nekadar sportu seversin hem sport ruhunu gösterersin».
Kızların hem çocukların komandalar arasında voleybol görüşmeleri da pek üüsek uurda oldu. Meydanda girgin maçlar geçti, siiredicilär da kendi favoritlerini aktiv destekledilär. Büük meraklık «Şen startlar» yarışmalarına oldu. Komandalar hızlılıkta, çemrekliktä hem birliktä yarıştılar.
«Bän taa kuvvetli olmak isteerim, kuvvetli hem çempion olmak isterim».
«İlk sıra bana bu sport pek hoş geldi. Sora bän taa büük havezlän yapmaa başladım. Bana bizim trenerlär, bütün kızlarımız hem bütün oyunnarımız hoş gelir».
Sportçular hazırlanmanın üüsek uurunu nışannadılar hem bölä olayların önemniini esaba aldılar. Trenerlär söledilär, ani bölä yortular pek faydalı uşaklara deyni.
«Bölä yarışmalarda pay almak herzaman prestijlidir — bu ilk. İkinci bu, nezaman uşak kendi becermeklerini sport meydanında gösterer, başka çocuklarlan yarışêr hem biz onların fizik hazırlıını göräbiliriz. Bölä yortunun geçirilmesi pek ii».
«Çünkü bu her yıl yaz sezonunun açılış yortusu hem çocuklar bu olaya pek sevinerlär. Onnar ilin atletika, türlü estafetalara katılȇrlar, diri baaşışlara güreşeceklär. Sport sade profesional olarak diil, saalık için da önemliydir».
«Bugünkü olay taa çok uşakları sport uuruna çekmää için geçiriler. Sport yortunun final bölümü diri ödül için – güreş yarışmaları oldu».
Bu güreş çeşiti adetça olarak meraklandırȇr çoyu insannarı hem gagauz halkının en gözäl sport adetlerin biri sayılêr. Matta sportçular kuvetlerini, dayanıklıklarını hem ustalıklarını gösterdilär, siiredicilär da onnarı aktiv destekledilär. Komratta Olimpik akıntısı hem sport günü, hazırlayanların laflarına görä, gösterdi, ki sport insannarı birleştirer, karakteri kaavileştirer hem gençlerä eni başarlarа ihlam verer.