Komrattakı Su kanal muniţipal çorbacılıı haberledi eni paalar için suya hem kanalizaţiyaya. Energetika soruşlarında Milli agentstvosunun kararına görä su için tarif kuracek 31 ley 9 ban bir kubametra için, kanalizaţiya da – 16 ley 39 ban. Ȇkonomika agentleri suyun bir kubometrası için ödeciklär — 37 ley 31 ban , kanalizaţiya için 19 ley 67 ban – eklemä vergileri alarak hesaba. İlkindän sa Su kanal kurumu istärdi koyulsunnar paalar 42 leydän taa zeedä su için hem yakın 23 ley kanalizaţiya için. Ama regulätor taa iisik paaları kurdu da o girdi kuvedä 2026 yılın fevralin 20-dan- nicä Ofiţial monitorda tiparlandı. Suyun paasının kalkınması için Komrat muniţipiyanın primarı da haberledi.
Komradın başı urguladı, ki paaların üüselmesi verecek kolaylıı kurum işlesin ileri dooru kösteksiz hem versin insana suyu gecä-gündüz.
Bu takım, Energetika soruşlarında Milli agentstvosunun kararına görä sy için tarif insana deyni 72 proţentan zedä kalktı, ekonomika agentlerinä yakın 3 proţenda, Kanalizaţiya da yakın 10 proţendä üüseldi. İnsanda bu takım paaların üüselmesi için kendi düşünmekleri var.
«İnsanda, kimdä pensiyalar küçük bunu duyaceklar pek».
«Prost, ani paaları kaldırȇrlar. İlaçlar paalı, pensiyalar küçük- pek zoor, pek».
«Her zaman, paaların büüdülmesi o prost bir iş. Paalar hepsinä kalktılar, insan için düşünmää lääzım».
«Elbetki şaşȇrız paalara. Makar 5 leyä kaldıraydılar, ama diil 18-dän 31 leyä».
Taa bir önemli soruş, angısı için insan düşüner- nesoy metodologiyaya görä kurumda ayın bitkisindä bütünnä tarifleri sayacȇklar, bakarak ona, ani karar paaların kalkınması için sade fevrali ayın 20 kabledildi.
Energetika soruşlarında Milli agentstvosunun kendi sırasında açıkladı, ki kabledilän paalar taa küçük ondan angı paalarlan Su-kanal kurumu danıştı. Agenstvoda söledilär, ki alındı esaba balans, nekadar kurum arc yapȇr hem insanın da interesleri bakıldı. Eni paalar suya hem kanalizaţiyaya fevrali ayın 20 karara girdilär Monitorul ofiçial kiyadında tiparlanmasından sora.