Komratta geçti USA Freedom festivali,adalı Amerika Ştatların 250 baamsızlık yıldönümünä.Yortulu olay kuruldu Moldovada Amerika Ştatların Büük Elçiliinnän.Hepsi isteyennerdä oldu kolaylık daalmaa meraklı kultura yortusuna, tanışmaa muzikaylan, imeklärlän, oyunnarlan hem başka.
Festivaldä temsil edildilär Moldova hem Amerika Ştatların işbirlii proyektleri.Bundan kaarä, olaya hepsi gelmiş insannar ii notaladılar festivalin programasını.
«Pek ii olay, biz pek beendik, hepsi meraklı.Beendik onu,ani var nicä dil taşıyannarlan lafetmää. Bu regionun, gözäl devletin çok elementi var».
«Bütündän meraklı, gösterdilär hepsini,ne baalı Amerikaylan».
«Apansızdan geldik,ama düşünmediydik,ani bölä meraklı olacek.Uşaklar pek beendilär, onnara baaşış verildi».
«İi olay, şükürlük hazırlayannara bölä meraklı yortu için. Şükürlük kolaylık için üürenmää bişey eni, sevindirmää kasabanın yaşayannarını».
«Olay pek ii, gözäl atmosfera, meraklı informaţiya».
Moldovada Amerika Ştatların Büük Elçiliin temsilcisi Ȇlizabet Lourens urguladı partnörluun önemlisini.
«Biz tutturȇrız Moldovayı, onun baamsızlıı kabletmesindän beeri, işbirliktä olarak türlü uurlarda, ölä nicä ekonomika ilerlemesi, kiber koruntuluu, kaçkınnara yardım, daava sistemasında reforma hem sınırların koruması.Barabar biz kurȇrız taa koruntulu hem kaavi, ilerleyan gelecek bizim devletlär için»,- Ȇlizabet Lourens urguladı.
Komtat muniţipiya başı Sergey Anastasov urguladı,ani iş baalantıları Amerika Ştatlarlan yardım eder kasabanın illerlemesinä hem verer ii becermekleri.
«Çok türlü proekt bizim kasabamızda,becermeklärlän diişmäk, angılarını biz işbirliin vakıdında kablettik, kasabanın ilerlemesi için, bütün devlet da kableder. Open World programası aşırı birkaç sıra gittik o devletä hem başka programalar»,- Sergey Anastasov urguladı.
Festival oldu olayların birisi,angıları geçirildilär Moldovada, tanıştırmaa deyni insanı Amerika Ştatlarının partnörluk programalarınnan hem kaavileştirmää kultura baalantılarını hem devletin baamsızlıın 250-nci yıldönümünü nışannamaa.