Yanvarin 20-dä Komradın İoann Predteçi adına soborunda yortulu liturgiya geçti, onu Moldova hem Kişinöv Mitropolitı Vladimir götürdü. Büük liturgiyada pay aldılar Bakannık komitetin başın ilk yardımcısı İlya Uzun hem Komradın öndercilii. Ayoz okumaklarında din insannarı uygunnuk aylelerdä hem usluluk Duuma erindä olsun deyni dua ettilär.
Komradın Klisä kurbanı günündä yortulu litirgiyayı İoann Predteçi adına Soborunda Kişinöv hem Moldova Mitropolitı Vladimir okudu.
«Hristozu vatiz edän Ayoz İoann Predteçi adına yortu kış yortularını başaran yanvar günü. İoann Vatiz edän Kurtarıyı vatiz etti, bunun için kliseyä geleriz dua etmää. Bu büük gündä dä Komradın kurban gününü kutlamaa katılȇrız arhiereylän hem arhiepiskop Anatiliylän»,- Moldova Mitropolitı Vladimir nışannadı.
Yortulu Ayoz liturgiyasında regionun hem kasabanın öndercilii katıldı.
«Bizim soborun kurbanını nışanȇȇrız. İoann Predteçi günü Gagauziyaya deyni büük yortu. Hepsini kutlȇȇrım, başarıları dileerim. Dinimiz kaavileşsin, can erimiz temiz olsun, yolumuz da açık olsun».
«Kasabanın ayozu hepsini korusun. Komratlıları hepsini Soborun kurbanınnan kutlȇȇrım. Usluluk herbir ayledä hem dünnedä olsun».
«Komrat büük yortuyu nışannȇȇr. Soborun kurbanı yaşayannarın ruhuna hem adetinä baalı».
«Kasabanın kurbanı – en önemli yortu komratlılara deyni. Bunun için sabaalendän en ilk klisedä toplanȇrız dua etmää».
«Вu yıl sobor 170-ci yılını kutlȇȇr. Hepsini önemli günnän kutlȇȇrım».
Soborun kurban günü Prorok İlie adına klisenin klisä izmetçisinä Boba Födora deyni ruh hem istoriya tarafından önemli.
Födor Karabadcak klisä izmetçisi, protoierey: «Yaşayannarımız soborun yaşadılmasını hem ilerlerlemsini tutturȇrlar, gözellederlär. Sevinerim, ani Allahın evindä her gün dualar okunȇrlar. Bobalarımız da bizä deyni klisemizi korumuşlar».
İoan Predteçi günündä Sobor insannan doluydu. Liturgiyada pay almaa hem dua etmää büü da, küçüü dä geldi.
«May herbir ayledä Vanilär var. Hepsinä saalık dileerim, iilik hem kısmet».
«Pek büük yortu bizä deyni. Bän da Vaniyim. Bu yortuyu her yıl bakȇrız, kızkardaşlarım gelerlär».
«Hepsini yortuylan kutlȇȇrım. Kimdä olȇr kliseyä gelmää, kimdä dä olmȇȇr. Hepsinä Allaa hayırlıı gelsin».
Yortulu liturgiyanın bitkisindä mitropolit Vladimir Eni Zavet kiyadından 350 ȇkzemplär hem kalendarleri insana baaşladı.