Komrat Devlet Üniversitesindä regionda serbest seçimneri uurunda açık dialog geçti. Buluşmakta pay aldılar cümnä kurumnarı temsilcileri, ekspertlär hem jurnalistlär. Buluşmanın baş teması- Gagauziya HT seçimnerininnän baalı durum, bu soruşun çözülmesindä media kurumnarın rolü hem proţesin ţifra korkunçsuzluu.
Demokratiya institutların ilerlemesi hem seçimnerä inan buluşmanın baş temaları gibi açıklandılar. Buluşmanın pay alannarı lafettilär elektoral krizisin sebepleri için, seçimneri geçirmäk krisizi için hem seçim sistemanın reforma lääzımnıı için. Açıklayarak temayı, politika eksperti İgor Boţan nışannadı, ani krizisin baş sebeplerin arasında bulunȇr Seçim organın yoksuzluu. Bu da oldu sebep ona, ani seçimnerin geçirilmesindä problemalar var.
«Eer bu kurum adlanarsa «Merkez» — bu nışannȇȇr, ani o , nesoy da adlanmasa, herzaman işlesin lääzım. Bu büünkü krizisin temelindä bulunȇr. En ilkin oldu ölä, ani seçimneri yakışmazdı geçirmää, çünkü yoktu seçim organı, sora da başka sebeplär peydalandılar. Bu sebeplär baalı onunnan, ani merkez hem regional politikacılar seçim organın adına takıldılar»,- İgor Boţan nışannadı.
Ekspertlär nışannadılar o sebepleri, angılarından çekiler yaşayannarın inanı seçim proţesinä. Guseynov İgorin laflarına görä , Gagauziya yaşayannarı seçimnär ideyasından atılmȇȇrlar, ama var olan sistemaya hem onun faydalı olmasına kritik tarafından bakȇrlar.
«Sayȇrın önemni açıklamaa, ani Gagauziya seçicisi seçimnerä gücenik diil, onnar seçimnerin büünkü formasına gücenerlär. Cümnedä isteerlär seçim sistemanın diişmesini hem kuvet organnarını seçmäk sistemasının kuralları diişmesini»,- Guseynov İgorin laflarına görä.
Promolex hem Search Group kurumnarın aaraştırmaklarına görä, 75 % soruşturulmuş insannardan söleerlär, ani onnarın seslerindän merkez çıkışlar çekilmeerlär, 70 % -di da sayȇrlar, ani regional proţeslerin çıkışları onnarın seçimindän çekilmeer. “Выбор и альтернатива для Гагаузии” kurumun öndercisi İgor Yanak sayȇr, ani bölä buluşmaklar yaşayannarın politika hem hak uurunda bilgileri üüselmesinä doorudulu.
«Büünkü olay baalı Gagauziya yaşayannarın politika hem hak uurunda bilgileri üüselmesininnän. Gagauziyada elektoral korupţiya — eni bişey diil. Güç, ama yaşayannar kanon tarafından duydular bu olayı. Onuştan büünkü olay doorudulu diil sade haberlemeyä, ama praktika tarafından elektoral korupţiyanın çıkışlarını göstermeyä. Bi̇z prakti̇kada gösterdi̇k, ani bundan çekiler insannarın ekonomika durumu hem devlet proţesleri dä»,- İgor Yanak sayȇr.
Buluşmanın pay alannarı açıkladılar, ani problemaları açıktan açıklamak yaşayannarın inanını devlet institutlarına kaavileder.
«Büünkü olay pek önemni. Büün Gagauziya karşı geler demokratiyanın lääzımnı uurda ilerlememesi problemasınınnan, korupţiyaylan hem seçim krizisinnän. Sayȇrım, ani bölä soruşları kaldırmaa pek lääzım, onnar yardımcı olȇrlar serbest, kanona görä hem demokratik seçimneri geçirmää, çünkü demokratiya hem yaşayannarın seçimi devletin ilerlemesi uurunda temel olȇrlar»,- Valentina Sarı-Terzi İnovaţiya kompaniyaları Asoţiaţiya öndercisi söledi.
Buluşmayı geçirennär nışannadılar, ani bölä olaylar lääzımnı demokratiya institutların kaavilenmesi için, politika uurunda bilgilerin kaavilenmesi için hem aktual problemalarından çıkışları bulmak için.