Kongaz küüyü Kultura evindä ilk kerä geçti sport yarışması yaşta bulunan insannarın arasında. Sţenada hem konkurslarda karşı karşıya geldilär iki komanda- «İmpuls» Kongazdan hem «Mudreţı» Dezginja küüyündän.
«Мы парни бравые — 63+» yarışmanın pay alannarı gösterdilär energiyayı hem sport azartını. Programma içindä vardı yarışmalar çemreklik hem girginnik için. Pay alannar yaptılar işleri koordinaţiya, nışancılık hem da bilgilik için,hem da gösterdilär kendi yaradıcılık nomerlarını.
Komandalar hazırladılar muzikalı nomerları hem birbirini destekledilär. Zalda olan siiredicilär herbir çıkışı karşıladılar. «İmpuls» komandası Kongaz küündän belli etti, ki bu olay oldu — buluşmak, lafetmäk, hem da gösterdi, ani 60 yaştan sora da aktiv, şen hem sportçu var nasıl olmaa hem götürmää saalıklı yaşamayı.
«Biz kararladık, zerä etiştik o yaşa 63-tän yukarı, kim etişti pensiyaya. Bitki 10-15 yıl bizdä geçirilmedi bölä olaylar sport uurunda büük yaşta insannara deyni».
«Bizim veteran nasaatı Kongazdan kararladı geçirmää bölä olayı da bana danıştılar, bän tutturdum, düşündüm ayaktayken var nicä pay almaa, da çocuklar eklendilär».
Dezginja küündän «Мудрецы» komandası gösterdi hazırlık, şennik duygusunu hem komanda ruhunu. Komandanın temsilcilerin sözlerinä görä, onnar pozitivlan geldilär, ki birbirini desteklesinnär hem gençlerä örnek göstersinnär.
«Ki bizä baksın gençlär, insan, ki biz sevinelim neyä sä, gidelim ileri, zerä şimdi yok bişey, ani konuşalım, toplanalım bölä uurda».
Nicä söledi eks-deputat İvanna Köksal, bölä uurda olaylar yaşlı insanlara deyni yardım ederlär aktiv kalmaa, saalıını kaavileştirmää hem götürmää cümnä yaşamasını.
«Burada yaşamak becermekleri, bilgilär, sport hem yaradıcılık ta var. Çok saa ol sizä»,- söledi eks-deputat İvanna Köksal.
Payalannarı desteklemää hem komandaları kutlamaa Dezginja küüyün primarı Vasiliy Kapsamun geldi.
«Bän nicä genç olan, isteerim sölemää, ani insannar bölä yaşta bizä genlerä deyni örnek, akıllık. Siz bakȇrsınız bizim adetleri»,- Vasiliy Kapsamun söledi.
Jüri başı Pötr Kuru nışannadı, dostluk kazandı.
«Bizä etişmeer bu konuşmak, bän bilmeerim, kim kararladı geçirmää, ona şükür ederim, ani unutmȇȇrız eski adetleri»,- Pötr Kuru nışannadı.
Gençlik hem sport bakannıın başın erinä çalışan Pavel Tulbanın sözlerinä görä, komandalar üüsek uurda pay aldılar bu yarışmalarda.
«Çok saa ol pay alannara, hazırlayıcılara ilk ideya için, sizi pay alannarı girginnik için»,- Pavel Tulba nışannadı.
Yarışmanın sonunda 69:67 sayıylan “İmpuls” komandası taradı. Çempionnar ödülleri, diplomları hem 2000 ley kazandılar. “Мудрецы” komandası diplomaları hem 1500 ley para ödülü aldılar hem medalileri. Hazırlayıcıların sölediinä görä, bu yarışmalar taa bir keret gösterdilär, ki her yaşta insan aktiv, talantlı hem yaşamak energiyaylan dolu olabilir.