Kıpçak küüyün Recep Tayip Erdoganın adına 4-cü uşak başçasına «TİKA» agentliin koordinatoru Murat Zelan geldi.
Uşak başçanın terbiedenneri musaafirleri tuzlan ekmeklän kaarşıladılar hem gösterdilär birkaç yaratmak nomerlarını. Türkiyedän studentlärlän barabar «TİKA» agentliin koordinatoru Murat Zelan buluştu uşaklarlan hem onnara baaşışları verdi — cantaları, boyamak için renkli kelemneri hem boyaları. Buluşmanın önemni temaların biri — bakmaa nicä uşak başçasında geliştirildi proekt 15 kilovatlık güneş panellerin koyulmasında. «TİKA» agentliin koordinatoru Murat Zelan nışannadı, ani çok yıl yardım veriler regionun uşak başçalarına.
‘’Gagauziya bölgesindä Moldovada özellikleri kireşleri çok katkı alıyoruz. Bu gündä burada Recep Teyip Erdogan adına kireşindä önemni çalışmalar örüttük bu yılın süresindä — güneş panelleri erleştirdik — kısa zamanda onnar derveya alınacek. Burdakı enerci bu kireşimizdä düşürecek. Çok taa ucuza enerci olacek. Ayne zamanda bölä fizik projelär yaparkana, bir taraftan da soţial projelerimizi örütüyoruz. Bu gündä Türkiye universitetindän gençlerimiz var — bir afta Gagauziya bölgesindä — emeklär yapıyorlar, onnarı huzur evlerinä götüreriz, tatlıları yapȇrız — kireşlerimizä daadȇrız. Başka bir kireştäydik, orada gagauz kardeşlerimizlän evladlarımızlan buluştuk, onnar gençlärlän birliktä boyama yaptılar Moldovanın hem Türkiye turistik erlerini resimneri boyamalar yaptılar».
Kıpçak küüyü diil bir yıl barabar çalışêr «TİKA» agentliinnän. Onnarın yardımınnan küüdä çok türlü soţial hem infrastruktura proektleri yapıldılar, dedi Kıpçak küüyün primarı Oleg Garizan.
«TİKA”-ylan biz çok yıl iş yapȇrız. En büük projemız — yaslayı düzdük onnarın yardımınnan, 2016-ci yılda etmääzdi er yaslalarda- “TİKA” saa olsunnar düzdülär eni uşak başçasını.Bundan kaarä biz ortakta bizim parkı — Gagauz Türk adında bir park yapmaa çekettik, sport okula yardım ettilär hem taa da bir proekt — o bizim yaslada Erdoganın adına yapıldı güneş panelleri hem ötää dooru düşüneriz yapmaa yısıtmak sistemasını, ani osun odunnan da samannan da yısıtmaa , ani kışın uşaklara olmasın suuk».
Terbiedici hem gagauz dili üüredicisi dördüncü uşak başçasında Lidiya Todorova söledi, ani güneş panellerin koyulması pek lääzımnıydı hem yaslaya yardım edecek ileri dooru.
«Kaarşılȇrız koordinatoru Murat Beyi hem onun komandasını. Onnar geldi bizä bu gün bir proektlan — taktılar güneş panellerini. Bu proekt verecek bizä kolaylık komfortlu çalışmaa ötää dooru. Hepsi çocuklara bu gün verdilär baaşış — çantaları, kalemneri, tefterleri, angıları yardımcı olacek uşaklara üürenmää ötää dooru».
İmzalanan annaşmaklara görä finanslamak hem güneş panellerini koymak işlerini «TİKA» agentlii geçirdi barabar Kıpçak küüyün primariyasınnan.