Komrat Devlet Universitetindä geçti açık kapular günü. Üürenmäk kurumuna geldilär 12 klasların başarannarı , angılarına bu yakınnarda sıra gelecek ayırmaa kendilerinä zanaat.
KDU musaafirlerinä deyni açık kapular günündä geçirdilär ȇkskursiyaları universitettä, annattılar fakultetlär için hem hazırladılar buluşmaları üüredicilärlän. Kurumun rektoru Sergey Zahariya nışannadı universitetin önemliini hem annattı kolaylıklar için, angıları bekleerlär uşakları, hem nesoy programmalarda onnar var nicä pay alsınnar.
«Pek çok üürenmäk programaları var, üürenmäk gider 4 dildä. Halklararası programmalarımız var»,- Sergey Zahariya nışannadı.
Milli kultura fakultetin dekanı Oksana Kurteva açıkladı, angı zanaatlara var nicä üürensinnär başarannar hem nesoy onnar hazırlȇȇrlar becerikli üüredicileri, muzika zaamatçileini hem başka uurda uzmannarı.
«İsteerim urgulamaa, ani bizim devlettä, Gagauziyada hem aşırıda da lääzım pedagogika uzmannarı. Bizim fakultettä var nicä üürenmää filologia uurunda zanaatlara. Da bu uurda var yardım devlet tarafından. Başardıynan üürenmeyi üüredici zanaatında devlet verer yardımı 200 bin ley hem başka soţial lgotaları, angılarını kullanȇrlar genç uzmannar»,- Oksana Kurteva açıkladı.
Kendi duygularınnan pay oldular üürenicilär dä, angıları düşünerlär nereyi gideceklär üürenmää hem nesoy zanaat ayırmaa.
«Bu pek önemni , neçinki bu şans bizä deyni üürenmää kendi karakterini, uurunu. Da sayȇrım , ani bu en önemni ayırmak yaşamada».
«Bana geler bu pek önemni, çünkü diil hepsi biler nesoy universitet var, nesoy kolaylıkları onnar vererlär. Bän burada bir iki keret bulundum. Beendim burasını».
«Bän sayȇrım, ani başarana deyni zanaatın ayırması — pek önemni , neçinki o belli edecek senin yaşamanda. Kim sän olacan, nesoy insan olacan. Da bölä buluşmalar vererlär kolaylık dostlaşmaa, üürenecez nesoy kolaylıklar önümüzdä açılȇr».
«Büünkü günä biz aarȇrız kendimizä zanaat, angılarına üürenecez. Düün biz Kişinövda Asem universitetindä bulunduk, Ştefan Çel Mare akademiyasına gittik, büün da KDU geldik, bakaceez».
«Ȇkonomika fakultetinä gidecäm, bank hem finans zanaatına, o bana taa yakın. Düün Kişinövdaydık, büün KDU».
«Aşırıya üürenmää gitmeyecäm, düşünerim Kişinöva girmää üürenmää, himik fakultetinä».
Üüredicilär hep ölä nışannȇȇrlar , ani bölä buluşmalar faydalı uşaklara deyni , neredä onnar var nicä üürensinnär nesoy zanaatlar var, tanışsınnar üüredicilärlän, görsünnär nicä yaşȇrlar hem neredä üürenerlär.
Maya Slavova üüredici: «Bu önemni moment , açan herbir başaran kendisi ayırȇr yolunu, ki belli etmää kendi zanaatını. Açık kapular günü verer kolaylık tanışmaa üürenmäk kurumunnan, zanaatlarlan, angılarına üürederlär KDU studentlerini».
Açık kapular günü diil sade tanıştırdı uşakları üürenmäk kurumunnan, ama oldu interaktiv meydan, neredä herbiri duydu kendisini universitetin bir payı. Abiturientlarda var kolaylık ayırmaa zanaatları dört fakultettä, pay almaa Ȇrasmus programmasında, hem başka devletlerin üüsek kurumnarında üürenmää.