Kazayak küüyündä dolay yolun düzmesi proekti ilerleer. İşlär pay edili birkaç bölümä — sonuçta lääzım enilensin bütün dolay yolu. Taa derindän süjettä.

İşlerin ilk etapı yapıldı 2025-ci yılda. Gagauziyanın yol fondundan verildi 5 milliondan zeedä ley. Burada bir kilometra yol düzüldü enidän — yaptılar temelini, koydular asfalt iki kat, kaavilettilär yol boylarını. İki yıl geeri Bakannık komitetinä iniţiativaylan düzmää yolu çıkmış Halk topluşun deputatı Aleksandr Dülger.

ALEKSANDR DÜLGER GHT deputatı

“Bizim bu yol girdi Gagauziyanın programasına regional yollarına, angılarına veriler finanslar Gagauziyanın bücetindän. Üç paya pay ettik. Çekettik geçti yıl — bir pay — çekettik Kortendän girärkänä Çadır tarafından bir kilometra yaptık — neredä mezarlık, şindi ikinci etap Taraklıdan girärkänä. Problema pek vardı, kışın kalardılar furalar, maşinalar — trakturlarlan çıkarardılar, pek çok zeetlenärdilär”. 

Bu yılın sentäbr ayın 8-ndä düzmäk işlerin ikinci etapı başladı. Şindiki vakıtta düzlederlär eri, sora hazırlayaceklar yolun temelini, ondan sora da asfalt koyulacek, haberledi Gagauziya infrastruktura bakannıı baş injineri Boris Novak.

BORİS NOVAK Gagauziya düzmäk hem infrastruktura bakannıı baş injineri

«Burada bu yıl işlär yapılêrlar — genä 5 million ley verildi, bir kilometradan zeedä yol olêr, işlär üüsek uurda giderlär, doorudêtlar ilkin, sora taşlar koyulaceklar, biyaz variant deniler — 15 santimetra, iki sıra da asfalt olacek 10-nar santimetra- çok iş var».

Kazayak küüyün erindeki nasaatın başı Georgiy Yabanji urguladı, ani bu proektin aslıya çıkarılması pek önemniydi.

GEORGİY YABANJİ Kazayak küüyü erindeki nasaatı başı

«İsteerim şükür laflarını sölemää deputata. Bu erdä yol pek prost durumdaydı, büük maşinalar hiç bayıra kalkamaazdılar, onuştan burayı para pek lääzımdı koyulsun».

Kazayak küüyü primar yardımcısı Dmitriy Kalak söledi, ani düzmäk işlerindän sora bu yol taa kaavi hem korkunçsuz olacek şoferlar için.

DMİTRİY KALAK Kazayak küüyü primar yardımcısı

СИнхрон

«İslää,ani bırası yapılêr, bu uur pek önemni küü için — insannar geçerlär — burada hep problema vardı. Büük ük maşinaları geçämäzdilär, bizim yaşayannar da. Sayȇrım, ani burası lääzımdı yapılsın hem biz şükür ederiz hepsini, kim katıldı bu proektin işletmesinä hem kim finans uurunda yardım etti». 

Proektin bütündän paası kurêr 20 million ley. Dolay yolunu etaplara görä düzeceklär, ne verecek kolaylık bütündän onu eniletmää.