Komradın yaşayanını 41-yaşında Natalyayı Kıssa aarȇȇrlar. sentäbrinin 29-da o evdän çıktı da geeri dönmedi. Ozamandan poliţiya aramakları geçirdi. Kasım ayın 3-dä aaramaklar Kirsovo küüyündän — Beşalma küüyünädän ilerledi. poliţiya, Hatalı olaylarda Bakannıın çalışannarı, karabinerlar – hepsi 70 kişi pay aldı.
Komradın yaşayanını Natalyayı Kıssa, angısı sentäbrinin 29-da kaybeldi, bir aydan zeedä aarȇȇrlar. Aaramaklar Komradın üülen tarafında, Yalpug derenin boyunda geçirildilär hem ilerleyeceklär taa çıkışlar olmayınca. Yaşayannarın katılması aaraştırmaklara önemli, söleer Komradın poliţiya inspektoratın başın yardımcısı Мihail Guran: «Biz büün ilerlederiz Kıssa Natalyayı aaramaa, angısı sentäbrinin 29-da kayp oldu. O üülendän sora evdän çıkmış da diil belli nereyä gitmiş. Aaramaklar Komradın üülen tarafında geçtilär, derenin dolayanında. Büün ilerlederiz aaramakları Korsovo küüyündän Beşalma küüyünädän. Danışȇrım hepsi yaşayannara katılsınnar aaraştırmaklara. Natalyanın patredi var. Er birkemseydä varsa nesoy sa haber bu insan için, yalvarȇrız 112 yada 2-29-80 telefonuna baalansınnar».
Gagauziya poliţiya bakannıın başın yardımcısı Pavel Bunänu çizgiledi, ani insannarın haklarını koruyan bakannıın borcu – vatandaşları korumaa hem yardım etmää. O belli etti, ani butakım durumnarda herbir yardım faydalı olacek.
«Aaramakları kolaylıklarımıza, havaya görä, toplandıı insannan geçireriz. İslää olacek, sıradan yaşayannar da katılsınnar, çünkü var olan durum –hepsimizin problemamız. İnsana yardım etmää – bizim borcumuz, ama er insan da katılarsa – sade fayda olacek. Büün yakın 60 kişiya toplandı, aarȇȇrız boş eski evlerdä, pınarlarda, Yalpug derenin dolaylarında»,- Pavel Bunänu çizgiledi.
Şindi hepsi kuvedi sıbıdılma evlerä doorudulu, pınarlara, kırlara, yollar boylarında aaç sıralarına. Bundan kaarä, kaybelmiş insanın patretlerini sokaklarda yapıştırȇrlar, nekadar çok insan haberlensin, söledi Cümnä korkunçluksuz bölümün başı Pötr Kristioglo: «Geçän kerä biz Kirsovo küüyünädän etiştik, herbir boş evi Komratta baktık, Yalpug derenin boyunu geçtik. Büün bütün Kirsovo küüyü bakılacek, yaşayannarlan lafedecez, Natalyanın patredini daadacez. Yalpug derenin dolayı bakılacek, yolların boylarında fidannar sıraları bakılaceklar».
41-yaşında Natalya Kıssa – üç uşaan anası kaybeldi. Bitki kerä onu sentäbrinin 29-da Komratta gördülär, açan evdän çıktı da bilinmäz tarafa gitti. Hepsi, kim nesoy-sa haberi biler Natalya için, poliţiya yalvarȇr 112 yada 0(298) 2-29-80 telefonuna baalanmaa.