Gagauziya Bakannık komitetin temsilcilerin hem da Halk Topluşun deputatların aralarında karalandı annaşmak komissiyası, kayıl olmak için Gagauziya Bakannık komitetin kararınnan.
Gagauziya Halk Topluşun deputatları maasuz sessiyada, angısı geçti büük ayın 22 — dä geçirdilär oturuşunu, angısında karaladılar kurma annaşmak komissiyasını, kayıl olmak için Gagauziya Bakannık komitetin kararınnan. Avtonomiyanın kanondakı bölümün deputatı Aleksandr Dülger nışannadı, ani 2024 — cu yılın Baba Marta ayın 15 — dä çok diişilmeklär oldular Gagauziyanın Baş kanonunda. Diişmeklärlän Gagauziya Bakannık komiteti kayıl olmadı, da verdi danışmayı «Üg» apeläţiya palatasına geeri urmak için diişmekleri Gagauziya Baş kanonunda. Diişmeklär ilişerlär iki statyaya.
«Biz yazdık, ani GHT deputat görevinä seçimnär hem da Gagauziya Başkan görevinä seçimnär geçirilerlär ilk pazar günündä, ondan sora nicä deputatların vakıtları biter deputat görevindä. Bölä iş hiç birerdä yok. İkinci norma — bu açan biz yaptık Gagauziya Baş kanonun 46 statysında diişmekleri, angısına görä, ondan sora nicä deputat görevinä zamanı başarılaceklar, GHT — ın yok hakı kabletmää kararları, diiştirmää bişey. O zaman, açan bölä hak kanonda vardı taa ileri. Te bu diişmeklerin beterinä biz getirämeeriz lääzımnı hala respublika seçimnär normalarını — bizim seçimnär kodeksin normalarınnan?»,- Aleksandr Dülger nışannadı.
Gagauziya Bakannık komitetin başın ilk yardımcısı İlya Uzun nışannadı, ani Bakannık komiteti hazır gitmää kompromissa.
«Bakannık komiteti diil bir sıra söledi, ani seçimnär prinţipi kanona karşı gider. Ne planda? Dünnedä hiç birerdä sölenmeer, angı gün seçimnär lääzım geçsin, nicä siz nasaat ettiniz eni variantta — ilk pazar günü. Biz söledik, ani siz deputatlar kendiniz diiştirersiniz kanonu. Elbetki, bu annaşmak komissiya, elbetki lääzım, da biz barabar çalışacez»,- İlya Uzun nışannadı.
GHT başın işini bir vakıda götürän Nikolay Ormanji çizgiledi, ne için kablediler bu karar.
«Bu baalı taa yaşayannnarın 50% çıkmasınnan Başkan seçimnerınä. Biz yok nasıl bütündän geeri urmaa kanonu. Onun için, bu annaşmak komissiyası işlettirecek bu punktları, annaşayacez»,- Nikolay Ormanji çizgiledi.
GHT adından nasaat edildi üç kandidat annaşmak komisiyasına — Aleksandr Dülger, Vladimir Kıssa hem da Nikolay İvançuk. Hep bu gün geçti Gagauziya Bakannık komitetin da oturuşu. Gagauziya Başkan işleri bakanı İvan Kolioglo haberledi, kim girecek annaşmak komissiyasına Bakannık komitetindän.
«Nasaat ederim Gagauziya Bakannık komitetin adından üç kandidaturayı — bu o insannar, angıları işlettirdilär danışmayı, da bilerlär bütündän informaţiyayı. Bu Vitaliy Derevenko, Valentina Deli hem da Alöna Gümüşlü. Bu kandidaturalar nasaat edeceklär kendi variantlarını annaşmak komissiyasına, angısını biz hep ölä bakacez Bakannık komitetindä»,- İvan Kolioglo haberledi.
Variant, angısı bakılacek Gagauziya Bakannık komitetinnän, yollandırılacek GHT kabledilmäk için.