Beşgöz küüyündä geçti mini-futbol turniri, angısı adalıydı üürediciyä hem trenerä Kambur Dmitriya. O çok kuvek koydu, ki bu sport çeşiti küüdä ilerlesin.
Beşgöz okul sport meydanında toplandılar iki komanda bu yaşamak erindän hem bir komanda Kazayaktan. Onnar andılar adamı, angısı bütün yaşamasını uşaklara hem sporta verdi. Onun çocuu Aleksandr Kambur pek gurur duyêr bobası için.
«O iilik, o açık cannı, angısı ondan gelärdi, herzaman yakın yapaardı onu hepsinä. Onuştan uşaklar hepsi onu sevärdi. Bobam terbietti çok evladları. Herbir sportta da o gösterdi kendisini üüsek uurda hepsi bilgileri hem becermekleri uşaklara Verdi»,- dedi Aleksandr.
Dmitriy Stepanoviç üüretmedi uşakları sadece sporta — o terbi edärdi onnar olsunnar kaavi, akıllı, dayanıklı kişilär. Onun dersleri yaşamaya üüredärdilär. Dmitriy Kamburun kollegası Georgiy Stoyanov söledi onun profesional uuru için.
«O bu okulda çalıştı 18 yıl. Bän ozaman fizika üüredicisiydim. O pek islää öndericiydi ; birzaman da küsülü diildi»,- nışannadı Stoyanov.
Anmak turniri oldu bir saymak nışanı bu adama. Sport, angısına Dmitriy Kambur koydu yaşamasını, ilerleer Beşgiozdä hem toplêêr uşakları, dedi küü primarı Födor Todorov: «O pek aktiv bir adamdı, küü nasaatın başıydı, çok yıl okulun direktoruydu. Bütün yaşamasını okula hem bizim küüyümüzä verdi. İnsannar hepsi onu sayêrlar, onuştan toplandık geçirmää bu anmak turniri».
Bu sport turniri diil sade futbol oyunu, o taa bir kolaylık akılına getirmää saygılı üürediciyi hem onun derslerini, dedi üürenicilerin biri Daniil Kılçik: «O pek islää üürediciydi. Biz ondan örnek hep alardık. O benim trenerımdı herbir sportta. Bän tutmêêrım akılımda sportu, angısında Dmitriy Stepanoviç olmayaceydı ilk erdä… Hiç birzaman da bizä baarmadı, hep yalpak danışardı herbir üüreniciyä».
Turnir oyunnarın çıkışlarına görä, Beşgöz ikinci komandası aldı ilk eri, Beşgöz bir taa bir komanda, angısı kazandı ikinci eri, Kazayak küüyün komandası üçüncü erdä oldu. Tarayannar kablettilär kubokları primariyadan hem sponsorlardan.