Moldova devletindä çeketti haberlemäk kampaniyası «Işlä enikunu — evdä bekleerlär yakinnariniz!» Onun neeti nışannamaa, ani büüdülär kötü olayların sayıları insannarın iş erlerindä.
Gagauziyada hem da bütünnä devlettä var büük problemalar iş korumak sferasında. Bakmadaan, ani sık geçerlär kontrol etmeklär hem da profilaktika kampaniyaları, kötü olaylar iş erindä ilerleerlär, ȇkonomikanın hepsi sferalarında, nışannadı Gagauziya iş inspekţiyası başı İvan Komur. O çizgiledi ani bu yıl geçti 140 kontrol etmäk, belli oldu 700 kanona karşı gitmäk olayları iş uurunda.
«Gagauziyada 2025 — ci yılda oldu 22 kötü olay, angılarından iki olay bitti ölümnän. Olayın birisi şindän sora sayılı kurumnan, öbürü sa bulunȇr aaraştırmak stadiyasında, ama sanȇrım, ani hep kurumnan sayılacek. Bu 22 kötü olaylardan — 6 oldular cümnä sektorunda, kalanı sa özel kurumnarında. Bütündän çekti 22 kişi. Bu statistika söleer, ani lääzım yapılsınna dooru çıkışlar, da esaba alınsınnar soruşlar işin korumasında»,- nışannadı Gagauziya iş inspekţiyası başı İvan Komur.
Nicä nışannadı Gagauziya iş inspekţiyasının başı İvan Komur, kanona karşı gitmeklär sayıya koyulȇrlar ȇkonomikanın hepsi sferalarında, ama maasuz düzücülük hem da agrar sektorunda sonuçlar may alez zor. İş inspekţiyasında teklif ederlär iş verennerini taa cevaplı yaklaşmaa korkunçsuzluk soruşlarına, neçinki iş kuralların bakılmaları — bu diil forma, ama soruş, angısı baalı işçilerin saalıklarınnan hem da korunmalarınnan.
«Kaliteli üürenmäk için, herbir kurumda lääzım işlettirilsin maasuz instrukţiyalar işin korumasında hem korkunçsuzluunda. İşçilär lääzım bilsinnär herbir zanaat riskları için. Kurum lääzın versin kollektiv korumak tertiplerini, bakarak neylän zanaatlanȇr insan. Hep ölä kabledilsinär ölçülär, kolvememää deyni işçileri korkunçlu erlerä»,- nışannadı İvan Komur.
İştä korumak probleması kalȇr aktual diil sade Gagauziyada, ama bütünnä Moldova devletinä da. Devlet inspekţiyasının haberlerinä görä, sade 2025 -ci yılın ilk 9 ayın içindä sayıya koyuldu 515 kötü olay kurumnarda, angılarından 56 kişi öldü. Taa sık bu belli olȇr düzücülük, transport, agrar sektorlarında hem da alış — veriş kurumnarında, te o iş erlerindä, neredä ar iş — neredä taa üüsek risklär.