15 yaştan yukarı Moldova vatandaşların sadecä 44% işleerlär. Kalanı sa ne işleerlär, ne dä iş kendilerinä aarȇrlar. Busoy bilgileri Milli statistika bürosu açıkladı. 

Vatandaşların sadecä 44% işleerlär. Onnarın sayısından may 50% adamnar,  yakın 40%  — karılar. İşleyän insannarın 51% evli. Hep ölä Milli statistika bürosu açıklȇȇr, ani işleyän vatandaşların zeedesi kasabalarda işleerlär. Gagauziyanın yaşayannarı kendi bakışlarını açıkladılar. 

«Gençlär yok neredä işlesinnär. Hep ölä islää ödesinnäür lääzım. Hem pensiyaları üüseltsinnär».

«Vatandaşlar bekleerlär, ki kuvetlär eni iş erlerini açsınnar. Bu onnarın borcu bizim önümüzdä. Gençlär para kazanmaa deyni aşırı devletlerä gidip işleerlär. Başka çıkışları yok». 

«Hem kuvetlär kabaatlı. Bu benim bakışım. Devlettä ay paralar küçük. Paalar sa pek büük. Bu beterä gençlär burada kendilerinä iş aaramȇȇrlar, aşırı devletlerä giderlär.  Bän geçennerdä devletimizä döndüm. Burada pek zor. Hepsi pek paalı».

«Burada genç kalmadı. Hepsi gitti. Kaldılar sadecä yaşlılar. Benim da uşaklarım aşırıya gittilär. İş eri yok. Onnar uzakta, gelämeerlär. Bän dä siirek onnara musaafirlää giderim».

«Bän işleerim. Kim isteer işlemää, o kendisinä iş bulȇr. Aşırıya sa giderlär, çünkü orada ay paraları taa üüsek ».

«Bizdä çok pensioner hep taa işler. Gençlär sä burada perspektiva kendilerinä deyni görmeerlär. Bezbelli iş erleri aaz. Ama ay paralarımız prost diil. İslää ödeerlär. Sadecä taa çok perspektiva gençlerä deyni  olsun lääzım, onnar burada kalmaa istesinnär deyni».

«Pensiyalar hem ay paraları küçük. İnsannarımıza zor geler. Uşakları bakmaa zor, bu beterä kazanca gitmää sıra geler. Biz dä Türkiyeyä gidip, para kazandık. Şindi unukalarımı bakȇrım, uşaklarım sa kazançta. Ama isteerim, ki unukalarım analı-bobalı büüsünnär».

«Bana kalsa bu problema baalı onunnan, ani kurumnarın hem çorbacılıkların öndercileri işçilerinä deyni lääzımnın hem uygun koşulları kurmȇȇrlar. Devletimiz zamandaş zanaatları desteklesin lääzım, gençlerä yardım etsin, eni perspektivalar açılsınnar lääzım».

gagauzça 

Milli statistika bürosu açıklȇȇr, ani işleyän vatandaşların zeedesi kasabalarda yaşȇȇrlar. Kişinövda işleyennerin sayısı 56% kurȇr. Belţ kasabasında — 50%. En küçük sayılar Briçanı, Nisporenı hem Dondüşanı dolaylarında belli edildi. Burada 15 yaştan yukarı vatandaşların sadecä 31% işleerlär.