Çiçek ayın 21- dän 30-nadan Moldova devletindä Evropa imunizaţiya aftası geçer. Uzmannar açıkladılar, ani büünkü gündä vakţina en faydalı yardım korkunçlu infekţiyalardan hem insanın saalıını korumakta.
Evropa imunizaţiya aftası geçer neetlän ilerletmää ideyayı, angısı insannara karşı gelän hastalıklarından korumasınınnan baalı. GRT kanalın «Диалог в студии» programasında bölä akţiyaların geçirmesi faydasını açıkladılar. Mediţinanın en büük başarısı bu uurda — poliomelit hastalıını ensemäk, nışannadı Komrat saalık merkezin başın yardımcısı Valentina Fileva: «Bizim aramızda var yaşayannar 1950-ci yıllardan, angıları bilerlär hem aklılarında tutȇrlar o vakıtları, açan poliomielittan vakţina koyardılar. Ondan sora o hastalık azaldı insanın arasında. Ama biz hep okadar büün da ilerlederiz o vakţinanın koymasını , neçinki devlet uurunda vakţina programasına geçeriz».
Poliomielit – o çirkin bir hastalık. Eer o ölümä getirmäsä dä, o çok sıra insanı kötü sakatlaa vardı getirdi, açıkladı Valentina Fileva. O çizgiledi , ani vakţınanın yardımınnan dünnedä kızaklamaktan hem başka zor infekţiyalardan insannarın ölümneri aazaldı. Vakţinalar herbir yaşta koyulsunnar lääzım – çekederäk uşaan duumasından. Önemni eri kaaplȇr heryılkı sezon vakţinaţiyası proţesi dä.
«Bizä deyni çok önemni , ki yaşayannar annasınar , ani sade vakţina var naasıl kontrol edilän hastalıklara karşı olsun. Eer anarsak bizim dedelerimizin vakıtlarını, ozaman vakţina yoktu. Uşaklar arasında ölüm pek büüktü. Diri kalardı en güçlü hem kaavi saalıklan insannar»,- açıkladı Valentina Fileva.
Geçän yıl Moldovada 217 kızamak hastalıı sayıya konuldu. Doktorlar söleerlär, ani bu hastalık vakţina yapmayan insannarda taa çok karşı geler. Doktorlar ana-bobaları vakţinadan vazgeçmemää teklif ederlär, çünkü vakţina infekţiyadan korunması için en faydalı olȇr.