Kirsovo küüyün «Svetulka» uşak başçasında İlkyaz yortusu geçti. Oluş uşakları, üüredicileri, ana-bobaları, Gagauziyada bulgar cümnesinin temsilcilerini birleştirdi.
Маrtacıklar – bulgarların ilkyaz tradiţiyaların önemli payı. Onnarı martın 1-dä güüsä takȇrlar, nicä ilkyaz simvolunu hem başarlaa umudu. «Svetulka» uşak başçası bu tradiţiyayı Kirsovo küüyün en küçüklerinä vererlär. Terbiedennär türküleri, oyunnarı, şiirleri ilkyaza hem ana kulturasına adalı hazırladılar. Uşak başçasında özel dikkatlıı bulgar dilinä vererlär. Uşaklar eni laflarlan tanışȇrlar, Ana dilindä lafederlär hem halk tradiţiyalarını üürenerlär.
«Sınışların sırasında biz eni bulgar laflarını üüreneriz, dialogları kurȇrız, oynȇȇrız, türküleri çalȇrız hem oynȇȇrız. Pek önemli uşaklarımız ana dilindä lafetsinnär, kendi kulturasını hem tradiţiyalarını yaşatsınnar»,- Dima Stoynova «Svetulka» uşak başçasında bulgar dili üüredicisi söledi.
— Bän bulgarım. Kirsovo küüyündä yaşȇȇrım.
— Вizim uşak başçamızda bulgar dilimi dostlarımnan üüreneriz.
— Bizim üüredicimiz eni lafları üüreder, bulgar türkülerini hem oyunnarını.
— Şindi ilkyaz, havalar sıcaklȇȇrlar.
İlkyaz yortusuna uşak başçasında Gagauziyada bulgar cümnesinin başı Tatyana Rakovçena katıldı. O söleer, ani butakım oluşlar uşaklarımızı halkın sıralarınnan, yortularınna tanıştırȇrlar.
«Uşaklarımız pek käämil. Bu yaslaya seftä gelmeerim. Burada uşakların gülüşleri hepbir öterlär, haliz, açan millet giimnerinnän giimni. Oluşun önemlii bulgar halkın tradiţiyaların adetlerin ilerlemesindä. Yazık, ama Kirsovo küüyündä bulgar olannar bulgar dilindä lafetmeerlär. Bunun için anaları-bobaları uşaklarınnan Ana dilindä lafetsinnär yalvarȇrım»,- Tatyana Rakovçena söleer.
Uşak başçanın öndercilii belli eder, ani Ana kulturasına uşakların hem ana-bobaların aralarında merak büüyer.
Аnna Neykovçena, uşak başçası öndercisi, Kirsovo küüyü, nışannadı: «Bizim işimiz bitki vakıtlar diil sade uşaklarımızı, ama ana-bobaları da meraklandırȇr. Bizim davamız – uşaklar yasladan çıkarkana annasınnar hem kendi uurunda rumın, Ana dilini bildinnär».
Uşak başçasında hem ölä muzey çalışȇr, neredä bulgar evcimannıın tertipleri toplu. İki yıl geeri bulgar cümnesi uşak başçasına millet giimnerini baaşladı. Bu yıl uşaklara hem üüredicilerä tematikalı futbolkalar baaşlanıldılar.