Çelak aylesi Çadır kasabasında ilkyaz  laalä çiçeklerini evdä büüderlär. Lübov hem Ivan kararladılar bu işlän zanaatlanmaa diil sade biznes için, ama bundan kaarä sevinmelik hem gözellik insannara baaşlamaa.

Aslıya çıkarmaa bu ideyayı oldu kolaylık grant paraların yardımınnan hem kendi kontribuţiyasınnan. Ivan hem Lübov düzdülär tepliţayı türlü zamandaş avadannıklarlan, aldılar laalä suvannarını Gollandiyadan,  hem hepsini ne lääzım onnarın  büütmesi için. Bu gözäl çiçek tutulsun deyni gagauz erindä, Ivan hem Lübov siirettilär çok türlü üüretim videoları, araştırdılar dikmäk tehnologiyalarını, nekadar sıcak ya da serin lääzım olsun laalelerä. Çelak aylesi iki uşak büüder- Lubov onnarlan evdä oturarkana, istedi ki bu analık vakıdını faydalı geçirmää da açmaa bölä meraklı işi. Böleliklän bu proekt Lübov  için bir zanaat gibi oldu.

«Biz aldık satın suvancıkları, maasuz toprak, sulamaa deyni su — pH onda lääzım olsun hen taa başka. Biz açan gireriz burayı, dolu çiçek, gurur duyêrız kendimizi, ani yaptık, etiştik artık bu uura, büüttük çiçekleri. Onnar islää gittilär. 3 ayın içindä biz üürendik soţial baalantılarda sayfaları da götürmää, çiçekleri kesmäà, suvancıkları da kurutmaa.. Savaşêrız insannara satmaa laaleleri, var kim çok ta birdän alêr, ama insannara azar da satêrız, ki hepsi duysun yortuları hem herbir karı sevinsin»,- Lübov annattı.

Büün Çelak aylesi çok türlü laalä soylarını büüder — onnarın arasında “Avangard”, “Karri”, “Strong gold” hem başka. Çiçekleri enikunu hem sevgiylän keserlär, ki onnar çok vakıt sevindirsinnär insannarı kendi gözelliinnän.

Bu uurda Çelak aylesi durgunmaa istämeer. Neetlenerlär taa büük tepliţa yapmaa hem eni çiçek soylarını büütmää. Ivan Çelak annadȇr, ani açan alındılar bu iştän  şüpeleri   vardı,  dooru mu yaptılar, taa çiçeklär açmınca.

«Hep şüpelenärdik  dooru mu yaptık, düşünärdik nicä hepsini etiştirmää , neredän laalä almaa, nesoy toprak lääzım, nicä sulama. Lääzımdı ileri gitmää, da  te yavaş-yavaş biz hazırladık, hepsini, da yapa bildik»,- Ivan Çelak annadȇr.

Lübov hem Ivan Çelak büüttülär binnän  laalä. Yaklaşêr ilkyaz, onunnan barabar da gözäl bir yortu, Mardın sekizi — Karıların günü — bu şıralı çiçeklär sevindireceklär herbirini, kim onnarı kabledecek.