Brilliance Academy  klubun iki komandası Komrattan Academic Cup dünnä çempionatın uurunda estetika gimnastikasında Halklararası uşak yarışmaların prizörları oldular. Yarışmak noyabrinin 26–27-dä Bulgariyanın Samokov kasabasında geçti.

Brilliance Academy klubun körpä sporçuları Komrattan gümüş hem bronza medalilerini kazandılar 6-8 yaşında kategoriyasında. Brilliance Little Lady komandası uzun programaylan yarıştı,  Brilliance Rainbow – kısa programaylan hem o boy kategoriyasında.Grupalar için – bu ilk halklararası  yarışması oldu.

 «Ödül Bulgariyadan geldi. Biz uzun bir programaylan gittik da üçüncü eri kazandık».

«Medaliya sevinerim, çünkü yarışmaya katılmaktan hoşlandım».

«Benim ödülümä trenerlarım da, ana-bobam da sevinerlär».

«Bu benim ilk medalim halklararası yarışmasında».

«Biz pek dalgalandık, ama korkumuzu ensedik da taradık».

«Pek sevindim, açan taradık».

Başarlı Bulgariyada geçti Moldo devletindä çempionatı, neredä komandalar ikisi dä ikinci eri kendi kategoriyalarında kazandılar. Bu da verdi hak onnara devleti temsil etmää Halklararası arenasında. Klubun başı Anna Kudreţ komnadaların başarlıınnan paylaşȇr: «Bizä deyni önemli oldu hazırlık uurumuzu göstermää, angısına hazırlandık hem dünnenin en ii komandalarını görmää. Medalilär – bizim gezintimizin bonusu oldu». 

Tarayışı terbiedennerin dayanıklıı hem hergünkü çalışmaklar yardım ettilär, söleer klubun başı. Yarışmalara hazırlanarkana uşaklar 4 saadadan trenirovkaları yapȇrlar. 

«Trenirovkalarda hepsi kuvedimizi koyȇrız, ki yarışmalarda ii programayı göstermää».

«Hazırlnmaa zordu, ama biz çok çalıştık da taradık». 

 Uşakları yarışmada trenerdän kaarä analar tutturdular. 

«Analarımız bizi pek tutturdular, bu medali onnarın da kazandıı başarlıı».

«Çempionata benimnän birerdä anam geldi.  O dedi ki, dalgalanma hem korkma, sendä hepsi olacek».

«Yarışmada çok komanda pay aldı. Diildi belli, kim tarayacek, kim dä taradacek. Biz boş ellän gelmedik».

«Bu halklararası arenasında ilk yarışmaktı. Uşaklarımızlan hodullanȇrız, Moldovayı hem Gagauziyayı onnar hodulluklan temsil ettilär».

Gimnastkaların başarlıını notalaarkana, trener Anna Kudreţ komandaların sport kalendarini açıkladı. 

«Komandaları ileridä bekleer klubun, Respublika hem region yarışları»,- Anna Kudreţ açıkladı. 

Academic Cup dünnä çempionatın uurunda ȇstetika gimnastikasında Halklararası uşak yarışmalarında 6-8 yaş kategoriyasında tarayıcı olmaa deyni Bulgariyadan hem Moldovadan gimnastkalar yarıştılar.