Komrat kasabası Kultura evindä geçti olay, angısı İ.Gurfinkel adına Komrat Dolay bolniţasının açılışının 120-ci yıldönümünä adandı.
1906-cı yılın büük ayın 1-dä Komrat erli bolniţanın kapuları ilk yaşayannara deyni açıldılar. 120-yıldan sora bu olayı nışannamaa toplandılar mediţina uzmannarı, bu uurda işleyän veterannar, erli kuvet temsilcileri hem musaafirlär. Onnar şükürlük laflarınınnan danıştılar onnara, kim gecä-gündüz yaşayannarın saalıklarını hem yaşamaklarını koruyȇr.
«120 yıl -bu diil sade bir sayı, 120 yıl -o istoriya, bu bir büük epoha. Bizim istediklerimizin, bizim işimizin, bizim başarılarımızın asiri. Bu asirä bolniţanın temelindä çalışan insannar yaşamaklarını vermişlär. Büün bän teklif ederim tutalım aklılarımızda bu insannarı, şükür edelim onnarı onnarın işi için, angısının hatırınnan bizdä bölä käämil ilaçlamak kurumu var. 120 yılın süresindä burada kurtarılan insannarın sayısı sonsuz»,- nışannadı Elena Russu, bolniçanın başı.
Yortulu olayın süresindä derindän açıklandı ilaçlamak kurumun kurulması sayfaları. Aaraştırıcı İvan Dumunika annattı, ani dokumentlerä görä bu bolniţada işledilär birkaç boy ilaççı.
«Sevinerim büünkü yortunun bir payı olmaa. 2020-ci yılda Komrat dolay uzmannarın tekliflerinä görä bän bolniţanın istoriyasını aaraştırmaa başladım. MD Milli arhivindä birkaç ay işlediktän sora, bän 2022-ci yılın gücük ayında bir statya çıkardım hem dokumentleri gösterdim, ani ilk erli bolniţa Komratta açılmış 1906-ci yılın büük ayın 1-dä. Ama ilk düşünmeklär hem laflar bolniţanın açılması için taa 1880-ci yılda kaarşı gelerlär, haliz ozaman, açan Besarabiyanın üülen tarafında Ospa hastalıı varmış»,- İvan Dumunika annattı.
Yortulu olayın süresindä ödüllendilär mediţina uuru veterannarı, genç uzmannar hem ilaçlamak kurumun bölümnär öndercileri. Kutlamak sözlerininnän mediţina uzmannarına erli kuvet temsilcileri da danıştılar.
Stepan Kara Komrat kasabası primar yardımcısı: «Pek sevinerim, ani geldiniz büün bu yortuya. Bu taa bir sıra gösterer sizin sevginizi zanaata. Bu yıl tamannanȇr 120 yıl bizim bolniţamıza. Bu bolniţa 120 yıl sıravardı kurtarȇr yaşamakları, yardım eder yaşayannara. Hem yardım edärdi diil sade bizim kasabamızın yaşayannarına, ama dolay küülerin yaşayannarına da. Bizä deyni büük bir gurur, ani bu kurum bizim kasabamızda kurulmuş, açılmış, kasabamızda yaşayan meţinatların yardımınnan».
Büün İ.Gurfinkel adına Komrat Dolay bolniţası bütün Regionun en önemni ilaçlamak kurumnarın birisi sayılȇr.