Yanvar ayın 9-da Çadır kasabasının Hristozun Duuması adına klisesi kendi hram yortusunu kutladı.
Bu gündä klisedä geçti yortulu slujba. Geçirdi onu vladıka Nikolay. Onunnan barabar yortulu liturgiyada Çadır dolayın klisä izmetcileri da pay aldılar.
Çin sabaalendän inanç insannar geldilär kliseyä ki dua etmää Allaha hem şükür etmää yardım için. Hristozun Duuması — Kolada yortusu o önemni bir gün, açan ruh uurunda hepsicii birleşerlär, dua ederlär. Hepsi insannarı kutladı episkop Nikolay Roşka: «Bän dua ederim hepsi yaşayannara, diil sade Gagauziyada, hepsi inanıcı kişilerä ki Iisus Hristoz, angısı duudu Vefleemda ahırcıkta , baaşlasın bizim cannarımıza sıcaklık, güneş, sevgiyi Allaha hem yakın insannara».
Hristozun Duuması adına klisesi Çadır yaşayannarı için çok yıl sıravardır insannar için din merkezi olêr. Burada herzaman liturgiyalar geçirilerlär hem klisä yortuları bakılêrlar, söledi klisä izmetçisi Sergey Veliksarov: «Kutlêêrız hepsini bu günnän, Hristozun Duumasınnan, biz ona hazırlanêrız bütün yıl. Savaşêrız dua ederiz, her gün savaşêrız çıkmaa kliseyä, dua etmää, da duaylan çeketmää herbir günü. Avşamniin da iştän sora biz şükür ederiz Allaha — verer bizä izin, verer bizä kuvet, fikir ani nesoy götürmää, nesoy izmet etmää Allaha».
Klisä yortusu kurban — topladı barabar insannarı herbir yaşta, nışannayıp ani en önemni erdä bulunêr hristian zenginnikleri.