Kongaz küüyündä unikal bir sergi açıldı. Siiredicilerä teklif edildi tanışmaa genç patretçinin Kovalöva Zinaidanın yaratmalarınınnan.

25 patrettä avtor nesä annatmaa savaşȇr- aaçlık acısını, kimisi kahırını, kimisi yaşamaya doymazlıını, kimisi gözäl gelecää umudunu. Bakarak bu süretlerä unudȇrsın, ani onnar patret, çünkü avtor insannarın suratlarını sade diil, o duygularını da açıklamış, nışannadı Gagauziya Kultura bakanı Marina Semönova: «Okadar duygulu, derin maanalı , dalgalı, gözäl bir sergi, ani okadar çok emoţiya , ani laf ta bulamȇȇrım, pek gözäl , pek beendim ki sölemää nesä, bişey sölämemää. Neçin deyni, etlerim dikennener-okadar gözäl. Herbir temaya, açıklȇȇr bu sergi, iildip başımı isteerim sçlemää «Saa olsun» Zinaida Kovalöva, neçin deyni burada diil bir günün işi, diil bir yılın da. Belli ani insan toplamış, herbir patredin var kendi istoriyası».

Sergiyi açarkana Zinaida Kovalöva nışannadı, ani siirediciyä teklif edilän patretlär onun yaşamasının, küçüklüünün, bir payı. Bu patretlerdä o gösterer erleri, neredä o üürendi yaşamaa, sevmää.

«Bana deyni bu diil sade sergi, ama benim yaşamamın bir payı, küçüklüümün payı, aklımın bir payı. Bän duudum burada-Kongazdaţ Burada bön üürendim sevmää insannarı, burada büüdüm,  üürendim sevmää şavkı, evi – hem hepsi ne büün siz göreceeniz, onnar buralı»,- Zinaida Kovalöva nışannadı.

Patret yapmasınınan Zinaida çoktan zanaatlanȇr, annadȇr, ani bu iş verer ona kolaylık kendi becermeklerini taa üüsek uura kaldırmaa. Zinaidanın patretlerindä sık var nicä karşı gelmää kıpımnarlan onun kendi yaşamasından.

«Bän tutȇrım aklımda o kıpımı, açan bän geenä ana-boba önündä dizça iisözlemäk istedim, elbetki  bu adet, ama bana deyni o adettän büük oldu. Bunnar benim kökleriminnän baalantılar. Bunnar diil sade aklıma getirmeklär. Gagauz kulturasa bana deyni oldu nesä taa büük. O, neyi bän isteerim göstermää, o, neyi bän isteerim korumaa, o, neylän bän isteerim paylaşmaa»,- Zinaida Kovalöva nışannadı.

Kongaz küüyü primarı Mihail Esir nışannadı, ani bölä insannarın yardımınnan küü işin başka erlerdä dä üürenerlär, onun istoriyasınınnan meraklanmaa başlȇȇrlar.

«Pek sevinerim, ani bizim küüydä var bölä insannar, angıları saymȇȇrlar zaametini  da bakȇr bizim istoriyamızı, bizim küüyün insannarını andırȇr. Çok yıllardan sora»,- Mihail Esir nışannadı.

Akademik Todur Zanet nışannadı, ani Zinaidanın herbir yaratması peet gibi şıralı, gözäl.

«Poet, zerä poeziya diil sade yazılarda, poeziya olȇr yaratmakta da . Bän nekadar gördüm Canabinizim resimnerini, patretlerini, nicä deeriz gagauzça, hepsindä poeziya. Bir peeti yok nicä yazasın,  eer canın yanmarsa. Bakȇrsınız patredä dä görersiniz, ani bu insanın canı yanarmış, yanȇr»,- Todur Zanet nışannadı.

Serginin açılışına gelän musaafirlär kendi fikirlerini hem duygularını açıkladılar.

«O pek sever patret yapmasını, pek sever gagauz kulturasını, bana deyni dä bu pek önemni, onuştan bän uşaklarımı da bunu annatmaa savaşȇrım.  En pek bän swvdim yaratmayı “Aaçlıı geçirennär».

«Bän stilist gibi stil yapȇrım patretlerä, Zinaida da onnara diveçlik baaşlȇȇr. Diveçlik patretlär gibi, çünkü patretlär bir sıra da ölmeyeceklär».

Zinaida Kovalöva patretçiliklän üüsek uurda zanaaatlanȇr. Gagauz kulturası, adetleri onun yaratmalarının büük bir payını kaaplȇȇrlar. Onnnar pay alȇrlar türlü devlet hem halklaarası yarışmaklarında da.