«Sedef» folklor kolektivi Beşalma küüyündän gagauzların güz perdänkasına gösterim yapȇrlar kendi halkın adetlerini diriltmäk için. Evelki olay gagauzların kultura varlıını yardım eder korumaa, eski adetleri hem türküleri aklılarımıza getirder, evlad boylarınnan baalantıyı kaavileder.
«Sedef» folklor kolektivi Beşalmadan yaşayannarı hem musaafirleri güz perdänkasına teklif etti, ki gagauzların adetlerini cannandırmaa. Avşam eski türkülärlän, oyunnarlan, hem gülüşlärlän doluştu ölä, nicä taa ileri dedelerimizdä çok yıl geeri olardı. Kolektivin öndercisi Mariya Burlak inanȇr, ani butakım buluşmaklar kultura varlıını korudȇrlar, dirilderlär hem zamandaş gagauzlarlda merak çekerlär, nışannadı «Sedef» folklor kollektivi öndercisi Mariya Burlak: «Perdänkayı gençlär pek beklärmişlär. Beklärmişlär olsunnar kara üzümnär. Oturuş olarmıştı Panayıya yortusundan sora. Gençlär bakarmıştılar olȇr mı osa olmȇȇr mı kara üzümnär da taa tez toplanmaa perdänkaya, buluşmaa, tanışmaa».
Gagauzların evelki oturuşları genç kızlara deyni küüyün hem evcimannıın yaşamasında önemliydi, çizgiledi «Sedef» folklor kollektivin pay alanı Anna Markoglo: «Ozaman hayvannık vardı çok. Koyunnarı kırkardılar. Mamu yapaaları yıkaardı. Açan da güzlärdi mamu hadiedärdi perdänkaları yapalım da pıtrakları yapaalardan paklamaa. Ozaman iş çok vardı. Toplanardık her pazar, tetradi elimizdä türküleri yazardık, sora da üürenärdik. Ani perdänka yapacez. Sokaa süpürärdik, pak olsunţ mamu, bulä, komşular oturardılar bizimnän aulun boyunda. Şennenärdik, ani çocuklar uzaktan işitsinnär, ani bu maaledä perdänka var. çocuklar gelärdilär, elleşärdilär, oturardılar, sora başka erlerä dä gidärdilär».
Butakım avşamnar — o meydannardılar, neredä tanışmaklar, sevgililär peydalanardılar, çünkü oturuşlara çocuklar da gelärdilär, söleer «Sedef» folklor kollektivin pay alanı Georgiy Kapaklı : «Biraz etiştirdim. Var gittiyim da. Kızlar karannık olarkana toplanardılar alular boyunda, herbir maaledä olardı bu işlär. Genç çocuklar da gezärdilär, aarardılar kendilerinä yavklu. Türkü çalardılar hem işläärdilär yapaa».
Programada gençlerin büüklärlän pay alması – o halkın adetlerini diriltmäk örnää.
«Bän üürendim, ani perdänkada şakalaşȇrlar, konuşȇrlar, türkü çalȇrlar».
«Biz yapaalardan ayırȇrız pıtrakları. Sora bizim mamu yapȇr bizä çorap, terlik örer, iplik».
Perdänkalar paalıydılar diil sade gençlerin hem büüklerin dinnenmesinnän – onnar insannarı baaladardılar, dili kaaviledärdilär, küçüklerä halkın adetlerinä, dedelerinä saygıyı yaşadardılar, söleerlär insannar. Büün «Sedef» folklor kolektivi dirilder bu atmosferayı, ki gagauz kulturası yaşasın hem gelän evlad boyunu sevindirsin.