Yaklaşȇr sonuna 2025-ci yıl. Onu baştan bitkiyadan, saygılı siiredicilerimiz, sizinnän birliktä geçireriz. Sizä deyni haberleri, programaları hazırlȇȇrız, meraklı insannarlan hem önemni olaylarlan tanıştırȇrız. elbetki eni — 2026-cı yıla da sizinnän birliktä adımnamaa neetimiz var! Bu istememizi gerçekleştirmäk için dä şou-programayı kurduk — Eniu yıl GRT kanalında. Bu programa eni yıl gecesi ȇkrannara çıkacȇk. Hepsinizi onu siiretmää, büülü atmosferaya daalmaa teklif ederiz. Muzika, şen türkülär, sevgili artistlär — hepsi bunnar lemberdek olacȇk!
GRT-nın uzamnnarı siiredicilerä deyni Eni yıl gecesi için meraklı şou-programasını hazırlȇȇr. Hem Gagauz Erinin hepsi yaşayannarını hem musaafirlerini ȇkrananr karşısına teklif eder. Şou-programa dekabrinin 31-dän yanvarın 1-nä karşı gecesindä yayınnanacȇk. Herbir yaşta siiredici kendi beendiinä görä işleri göräbilecek.
Tatyana Stavilova, GRT-nın cuvapçı redaktoru, nışannadı: «Saygılı siiredicilär, karşılayınız Eni yılı GRT kanalınnan. Maasuz sizin için biz yazdın meraklı programmayı, angısında öteceklär gagauz talantlı artistlerin türküleri. Barabar bizimnän karşılayınız Eni yılı da sizin keefiniz herzaman ii olacȇk».
Eni yıl GRT kanalında şou-programasında eni türkülär, kutlamaklar, gözäl delemeklär hem sevinmeli duygular olacȇklar. Özel atmosferayı Gagauz Eri, Moldova hem Ukraina artistleri kuracȇklar: Natali Deniz, Konstantin Moskoviç, İlya Hem Evdokiya Kösä, Tozi grupası, Kadınca ansamblisi, Ferum hem çok-çok başka artistlär, kimin yaratmalarını bilerlär hem severlär GRT-nın siiredicileri.
«Bän çok severim gelmää Gagauziyaya, GRT-ya Eni yıl gecesindä, neçin ki isteerim insannarı sevindirmää kendi türkülerimnän. Hem dä bu gecä pek şen hem gözäl geçsin».
«Bizä deyni pek önemni pay almaa bu Eni yıl programasında çünkü biz pek beeneriz kendi avtonomiyamızı hem Gagauziyanın yaşayannarını. Sevineriz, ani Gagauz Erindä var GRT kanalı, neredä bizi siirederlär avtonomiyanın yaşayannarı».
«Tozi grupasının adından Gagauziyanın yaşayannarını kutlȇȇrtız Eni yıllan hem Kolada yortularınna. İsteeriz hepsinä adamaa saalık, kısmet hem bereket».
«Ne islää, ani bizdä var GRT. GRT-yı çoyu siireder, internedın yardımınnan sa bizi bütün dünnä siireder. Hepsinä kısmet, bereket hem uygunnuk dileerim».
Eni yıl gecesindä GRT-nin siiredicilerinnän birliktä olacȇklar televizionun jurnalistleri S.Dimitroglo hem Anna Karapirä. Onnarlan birliktä olacȇklar: türkücü, muzikant hem «DRIVE BAND» kaver grupasının öndercisi D.Kadın, D.Tanasoglu adına Gagauz milli teatrusunun aktöru A.Redjepov. Onnarın gülär üzleri, şen şakalrı özel keefi kuracȇklar. Butakım GRT herbir evä girip eni yılı herbir ayläylän birliktä karşılayacȇk
Eni yıl GRT kanalında şou-programası en beklenän proekt. Buluşacȇz Dekabrinin 31-dä da eni 2016-cı yıla sizinnän, saygılı siiredicilerimiz, birliktä aykırlayacȇz!