Büün gagauz radiosu hem televizionu 18 yılı nışannёёr, nicä o kabletti cümnä statusunu, makar ki da regional televizionun istoriyası çeketti taa 20-ci asirin 80-ci yıllarda. Bu vakıdın süresindä GRT geçti uzun yolu- cannı efirlerdän zamandaş multimediya formatlarınadan. Bakmayarak zorluklara GRT yapȇr kendi cümnä misiyasını, ilerleder yayınlamak formatlarını, genişleder auditoriyayı hem kaavileder siiredicilerin hem sesleycilerin inanını.
Cümnä statusu o diil sade format, o ayırı bir misiya cümnä önündä. Kompaniyanın sloganı ölä da öter halklan bilä bir yoldan gideriz. GRT kaaviletti kendisini, nicä obyektiv haberlerin önemni bir sızıntısı, kalarak dialog için hem cümnä bakışların açıklamak için erlän. Ne o GRT büün?
«Haberlär»
«Televizion o nesoy o islää, bizim halkımızın.»
«GRT o radio maşınada»
«GRT o televizorda kanal»
«GRT – o gagauz radio televizionu, angısını biz sesleeriz, severiz, angısı herzaman bizimnän. Onu herzaman sesleeriz açan işleeriz dışarda. Sizdä ölä şen muzika sizinnän yortuyu var nasıl kutlamaa».
«Aderız başarları bakerız bütün aylaylan».
«Radio hem televizionu kutleerız duuma gününnana. Aderız başarları».
Radio baş redaktoru Galina Maresyeva nışannadı, ani auditoriyanın tutturması yardım etti kolektivä kaybetmemää umudu yaarınkı günä.
«Gagauz radiosu o regionun sesi. Biz savaşerız insannan yanında olmaa , sölemää onun için ne önemni da bunu yapmaa ana dilindä sevgiylän hem sıcaklıklan ana topraana. Şükür ederim hepsi siiredicileri hem sesleycileri, angıları bukadar yıl sıravardır bizimnän kalerlar hem bizä kuvet hem inan vererlär ani biz işleeriz halkı için»,- Galina Maresyeva nışannadı.
Ama yortulu data düştü diil ilin vakıda- bitki zaman teleradio kompaniyası karşı geldi bir sıra zorluklarlan, angıların aralarında sankţiyalar, hem da GRT çıkarması presa izmetlerin listesindän. Televizionun baş redaktoru Valentina Koroläk urguladı, ani kolektiv hepsini kableder, nicä yaşamasının denemesi.
«18 yılın içindä biz gösterdik, ani GRT lääzım baamsız olsun. Bizim misiyamız izmet etmää cümneya ama diil politika intereslerinä. Biz işleeriz açık dooru da bunun için sayȇrız ani hepsi erli erinä gelecek»,- Valentina Koroläk urguladı.
GRT — diil sade radio hem telekanal, o Gagauziya istoriyasının bir payı. Bakmayarak denemeklerä, komanda ilerleder işlemää kendi auditoriya için, kurup kontentı, angısına inanȇrlar. Bu yoldan gitti Tatyana Stavilova, haberlär için cuvaplı kişi. Şansora 18 yıl o GRT işleer, çekedip kendi çalışmasını ozaman, açan kompaniya cümnä statusunu kabletti.
«18 yıl geeri, açan geldim GRT kompaniyasına çalışmaa taa düşünmärdim, ani jurnalistika bölümü ölä önemni bir uur. Bän şindi annerım ani biz var nasıl diiştirelim insanın bakışlarını. Bu üzerä lääızm dooru göstermää ne oler Gagauziyada, profesional çalışmaa hem beenmää kendi zanaatımızı. Hepsi kolegarlda olsun energiyaları, sevgileri bu işä ki biz herzaman başarılı çalışalım hem ileeri gidelim»,- Tatyana Stavilova urguladı.
GRT- da sabaa çekeder şamatalı- uzmannar materialları hazırlȇȇrlar, tehniklär tertipleri bakȇrlar, ama vizajist götürücülerin süretlerini yapȇr- saçlarını hem makiyaj yapȇr. GRT o diil sade efirlär hem haberlär, ama bir büük aylä, angısında koruyȇrlar adetleri, açıklıı hem evlad boyların baalantılarını. GRT uzmannarın uşakları taa küçüklüündän duyȇrlar bu erin özel atmosferasını.
Roman hem Nina Kazaku: «Kuvet hem dayanmak. Nekadar interviyü verdim birda keret mamuma seläm yollamadım. Mamu seläm severiz hem sayerız. Bu ilk keret bu ilk keret anama seläm. Göster Maşi babuya seläm. Sölä baba».
Bu gülmesemelerdä hem laflarda- GRT sıcak atmosferası, neredä profesionalizmaylan herzaman bulunȇr insan canı hem sıcaklıı. GRT kolektivi sayȇr, ani cümnä yayınlanması – o diil sade status, ama cuvaplık cümnä önündä.