GHT sıradakı oturuşu büük ayın 5-dä lääzımdı geçirilsin, amma onda deputatların taa çoyu gelmedilär. Bu oldu sebep ona, ani oturuşu başka günä geçirdilär.
GHT sıradakı oturuşu büük ayın 5-dä lääzımdı geçirilsin, amma onu büük ayın 12-nä geçirdilär. Oturuşa sade 16 deputat geldilär. HT başın yardımcısı Georgiy Leyçu açıkladı, ani oturuşa gelmeyän deputatlar isteyiptä bunu yaptılar.
«Var nıcä yapalım çıkış, ani bu iş plannanmış bir akţiya gibi yapıldı. Başka bir soruş, biz bilmeeriz ne neetlän bunu kalanı yaptı. Eer bu baalıysa seçimneri geçirmäk gününnän, bu arşı koyȇr diil sade kanonnara, amma seçimneri geçirmää isteyän yaşayannarın bakışlarına da. Bu soruşu uzaltması fayda dolayımıza getirmeyecek»,- Georgiy Leyçu açıkladı.
GHT seçimnerini geçirmesi için arçları smetası soruşu pek önemni, çünkü seçimnär vakıdında geçirilsinnär lääzım, nışannadı Bakannık Komiteti başın ilk yardımcısı İlya Uzun: «Biz lääzım yapalım herbir işi, ani seçimnär vakıdında geçirilsinnär. Onuştan teklif ederim telefon açasınız kollegalarınıza hem onnarı teklif edäsiniz oturuşa».
Oturuşa katılmayan deputatlarn arasında Soţialistlär partiyası deputatları bulundular. Biz onnarın önderciasininnän baalanamadık. HT deputatı Nikolay İvançuk danıştı avtonomiyanın yaşayannarına ki onnar kendi dolayları deputatlarına oturuşa gelmeleri için danışsınnar.
«İsteerim danışmaa yaşayannara, kionnar kendi deputatlarına danışıp teklif etsinnär onnarı oturuşlarına, ki biz vakıdında kabledelim hem geçirelim seçimneri»,- Nikolay İvançuk danıştı.
Oturuşun süresindä seçildi karar HT sıradakı oturuşunu büük ayın 12-dä geçirmää hem bu soruşu enidän bakmaa. gagauziya MSK başı, angısı MD seçim kodeksindä belli ediler nicä Merkez seçim nasaatı, Pötr Zahariya nışannadı, ani büük ayın 12-dä soruşun bakılması Seçim organına engel etmeyecek, çünkü seçim periodu, kanona görä seçimnerädän 60 gün öncesi başlȇȇr.
«Deputatlar büük ayın 12-dä taa bir denemäk yapaceklar. Umutlanȇrız, ani onnar oplanabileceklär da kabledeceklär bu soruşu. Eer amma bu iş büük ayın 12-dä olmarsaydı seçimneri lääzım olacek başka vakıda geçirmää»,- Pötr Zahariya nışannadı.
GHT sıradakı seçimnerin geçirilmesi baba marta ayın 22-nä plannandılar.