MSK,angısı daaldıydı 2023 yılın dekabrinin 26-da GHT kararına görä , Üüsek Davaa palatasının kararına görä enidän kendi haklarına girdi. 2025 yılın noyabrinin 27 onun daalması kanona karşı belli edildi. İleri dooru nesoy GHT tarafından proţedura olacek, üürendi korespondentımız.
GHT lääzım eniletmää MSK hem ayırmaa etişmeyän azaları,bütün kanona görä sayı olsun deyni 9 aza, nışannadı GHT spikerin işini götürän Nikolay Ormanjı. MSK toplumuna girer üçär aza GHT, Bakannık komitetinnän hem davaa organnarından.
«Hepsi kuvet dallarından biräz azal verdilär danışmaklarını,ani ileri dooru çalışmaa istämeerlär.Şindi biz danışȇrız hepsi kuvet dallarına o iş için, ki ayırsınnar kısa zamanda, 10 günün içindä, diiştirän azaları hem versinnär rezerva kandidatları, nicä kanon bunu isteer.Çıkacek GHT, eski azaların danışmaklarını alacez esaba, hem temsil edilmiş listeleri kabledecez»,- nışannadı GHT spikerin işini götürän Nikolay Ormanjı.
MSK toplumun belli etmesini plana koyulu geçirmää 2025 yılın dekabr ayın 20 nädän. N.Ormanjının laflarına görä, GHT hem Bakannık komiteti hazır tutturmaa bu soruşu , MAK çekettirsin deyni kendi işini, sora da hazırlasın hem geçirsin GHT deputat seçimnerini,angılarını plana koyuldu geçirmää 2026 yılın mart ayın 22-dä.