GHT deputatları Komrat kasabası Kultura evindä mart ayın 17-dä taa bir oturuş geçirdilär. Onun süresindä bakıldı soruş, angısı baalı MD Üstiţiya ministerliin danışmasınınnan Konstituţiya daavasına, «Gagauziya maasuz hak statusu kanonun» kimi statyaların bakılması için.
MD Üstiţiya ministerliin Konstituţiya daavasına danışmasında laf gider avtonomiyanın kimi kanon normaların hak statusu için hem MSK kurulmasınınnan baalı kimi normalar için. HG geniş oturuşunda pay aldılar deputatlar, Bakannık komitetin azaları, erli kuvet temsilcileri, avtonomiyanın eks-başkannarı, cümnä temsilcileri, nışannadı GHT başın işini götürän Nikolay Ormanji: «Seçi̇mneri̇n dolayında zor durum yok. Büün HT MSK azalarını kaaviletti. Güç, ama daava uuru kendi kandidatlarını vermedi, ama seçim organı 6 kişiylän dä kanona görä işlesin yakışȇr. Belli ettik seçimnär gününü dä».
Seçimneri geçirmesi durumunu açıkladı Gagauziya Bakannık komiteti başı ilk yardımcısı İlya Uzun: «Herbirin var hakı güreşmää deputat hem başkan görevi için. Sade bölä demokratiya metodlarınnan biz halkın temsilcilerini seçelim yakışȇr. İi mi, osa kötü mü temsilci-önemni diil. Eer halk verdiysedi ona bu hakı- nışannȇȇr, ani o kanonca oldu hem onnar verilmiş vakıdın süresindä kendi görevlerini gerçekleyeceklär».
Zor durumnardan çıkış için kendi bakışını Gagauziya ȇks-başkanı İrina Vlah açıkladı.
«Kendi sözümdä bän kendi bakışımı açıkladım. Pek büün yannışlıktı HT deputatlarına birtaraflı karara görä Parlament arası iş grupasından çıkmaa. Bu pek büük yannışlıktı. Bununnan kaybeldi kolaylık problemaları ikitaraflı dialoglarlan açıklamaa. Bu getirdi ona, ani herbir taraf büün biri-birini kötüleer ayırı odalarda. Onuştan bän herzaman söläärdim, ani dialogun yardımınnan var nicä bir karara gelmää. Kimär sıra lääzım aşaa kalmaa, çünkü sözleşmäk zor koşullarda geçer, ama aşaa kalmaklan, biri-birini işitmäklän, biri birini seslemäklän var nicä başa çıkmaa. Umutlanȇrım, ani hem Moldova hem Gagauziya tarafından ariflik peydalanacek hem bu zor durumun çıkışı bulunacek»,- Gagauziya ȇks-başkanı İrina Vlah açıkladı.
MD Parlament deputatı İgor Dodon çizgiledi, ani GHT seçimneri kanona görä geçirilsinnär lääzım. O çizgiledi, ani neetlener bu soruşu MD Parlament oturuşunda kaldırmaa neetlener.
«Bi̇z bu soruşu MD Parlamenti̇ndä kaldıracez. Bu günnerdä bän soruşu Evropa partnörlarına da açıklayacez»,- İgor Dodon çizgiledi.
Aklınıza getireriz, ani MD Üstiţiya ministrusu Vladislav Kojuhar danıştı Konstituţiya daavasına «Gagauziya maasuz hak statusu kanonun» kimi statyaların enidän bakılması için. Burada laf gider 1994-cü yılın 344-cü kanonu için hem kimi başka kanon normaları için.