GHT yapêr hepsi işleri, ki çıkmaa hak krizisindän. Deputatlar kararladılar kurmaa kayıllık komisiyasını barabar Bakannık komitetinnän. Onun baş neeti — belli etmää bir kararı Gagauziyanın Temel kanonuna diişmeklär için.
Gagauziya Halk Topluşu hem Bakannınnık komiteti lääzım hazırlasınnar maasuz annaşmak proektini, angısı doorudulacek daavaya. Bunun için «Диалог в студии» programasının sınırlarında haberledi GHT deputatı Aleksandr Dülger: «Kollegaların çoyu annêȇrlar, ani bu durumdan çıkmaa var nicä Bakannık komitetin kayıllıınnan. Burada isteerim nışannamaa, ani diil hepsi normalar belli, angıları taa ileri Gagauziya Temel kanonuna giriştirildi. Onnarın arasında var önemni bölümnär, ama var diil dooru işlär dä».
Kayıllık komisiyası lääzım hazırlasın düzüşmäk proektini. Bundan sora dokument doorudulacek daavaya.
«Alıp esaba, krizisi hem var olan zorlukları, angıları ilişerlär Gagauz Avtonomiyasının statusuna, soţial uurunda herbir faydalı işä lääzım yardım. Komisiyanın çalışmak çıkışları en ilk lääzım olsun faydalı Gagauziya yaşayannarına. Seçimnär hep okadar lääzım geçirilsinnär, çünkü sadece bölä kuvetlär haklı olêrlar»,- İgor Yanak, hak soruşları eksperti, haberledi .
Öncä Gagauziya Bakannık komiteti başı ilk yardımcısı İlya Uzun nışannadı, ani Bakannık komiteti hazır bu soruşlan kayıl olmaa. Yakın vakıtta iki taraf konsultaţiyaları geçireceklär.