Gagauziya Baş kasabasında Komratta, sentäbrinin 12 – dä geçek milli horeografiya festivali: «GERMEK OYUNU», angısı adalı maȇstroya Germek Konsantinä. Festival bir sţenaya toplayacek türlü evlat boyların temsilcilerini, angıları ilerlederlär milli horeografiya adetlerini. Temayı ilerleder Polina Barbova.
Festivalin süresindä bir sţenada toplanaceklar horeografiya kollektivleri , çalgıcılar herm da halk oyunnarın sevenneri. Sıiredicilär göstereceklär numaraları, angıları kurulu adet kulturası hem da milli oyunnarın motivlerindä. Ayırı eri programada kaplayaceklar nomerlar, angıları adalı Germek Konstantinin paasız yaratmasına – anılmış horeografa hem da ustacıya, angısı çök kuvet koydu milli oyunnarın ilerlemesinä, çizgiledi Gagauziya kultura hem turizma Baş bakanı Mari̇na Semönova.
«Siıredicilerin olacek kolaylıkları tanışsınnar taa yakından diil sade gagauz oyunarınnan, ama hep ölä moldovan, bulgar hem da ukrain oyunnarınnan. Festival meraklı olacek. 300 – dän zedää festivalin pay alannarı bir sţenada — bu olacek gözäl, açık, hem renkli mozaik, angısı kurulu olacek milli elementlerindän».
Mari̇na Semönova maasuz kendi bilärdi hem da dosttu Konstantin Germeklän, hem da birkaç yıl sıradan çalıştı onunnan barabar. O büük sıcaklılklan hem saymaklan getirer aklısına kendi kollegasını hem da onun yaptıklarını milli horeografiyanın ilerlemesindä.
«Konstantin Afanasyeviç — pek üürenmiş insandı, terbiyeli insandı, intelligent. İnsan, angısınnan pek komforttu işlemää. Kendi işindä o professionaldı.O
pek incä yaklaşardı herbir oyuna, herbir yaratmasına, kalardı sade örnek ondan almaa. O pek incä duyardı ne yapȇȇr.
Konstantin Germek – anılmış gagauz horeografı, baletmeyster hem kultura uzmanı, angısı oldu professional gagauz oyun şkolanın kurucuların birisi. Küçüklüündän taa sevärdi halk oyunnarını. Çok yılların süresindä çalıştı MD Şannı kollektivinnän, «Düz - Ava» gagauz oyun hem türkü ansamblisinnän, kurup oyun postanovkalarını, angıları belli edärdilär gagauz halkın ruhunu, karakterini hem da adetlerini. Konstantin Germek duudu 1952 yılın sentäbrinin 15 — dä Valkaneş kasabasında, geçindi sa 2022 yılın aprelin 2 – dä. Maȇstrunun yaradıcılıın sevennerini bekleer meraklı konţert programası, açık oyun postanovkaları hem da kolaylık tanışmaa Gagauziyanın kultura paalılıklarınnan. Oyun hem muzika yortusu geçecek Komrat kasabasının kultura evindä sentäbrinin 12 – dä saat 3 –tä.