Moldovada başlȇȇr programa, angısı doorudulu genç üüredicilerin profesional uurnda tutturmasında. Onun neeti üüseltmää üüretmek kalitesini hem kaaviletmää okulların kadra potenţialını. İniţiativaya görä genç üüredicileri verileceklär becerikli kadroların elinä, angıları yardım edeceklär onnara sınaşmaa zanaata da genişletmää lääzımnı kompetenţiyaları. Gagauziyada genç üüredicilerin okulu yardım eder genç uzmannara beş yıl.
Moldova devletin üüretim ministerliin haberlerinä görä her yıl devletin okullarına geler üzlän genç uzman, ama çoyu onnardan ilk işlemäk yılından sora, brakıp, giderlär iştän. Baş sebeplär- büük ük, praktika bilgilerin etişmemezlii,tutturmasının yardımın hem annaşmanın yoksuzluu kolektivdä, söleer rus dili hem literatura genç üüredicisi İvanna Kurdoglo: «Var nasıl ödekleri zeedeletmää, var nasıl posobiya vermää, ama erlim kolektivdä annaşmak yoksa, ozaman insan orada çok durmayacek. Onuştan bu en önemni, neçin genç insannar 3-5 yıldan sora, brakıp, giderlär. Bu diil baalı derslärlän, dokumentlärlän, neçinki buna universitettä hazırlȇȇrlar, teoriyayı biz hep orada kablederiz, ama yaşamak momentlär ölä, nicä ana-bobaylan lafetmek, kolektivlän annaşmak, nekadar bizä yardım ederlär, oradan çekiler bizim ilerki zamanda gelişmemiz ta, nekadar biz isteyecez katılmaa türlü olaylara hem proektlerä».
Her yıl Gagauziyanın üüretim sistemasına geler yakın 50 genç uzman da nesoy sa da hazır onnar olmasınnar, genç üüredicileri hep okadar lääzım tutturmaa hem üüretmää. Da eni progrograma, angısı doorudulu genç üüredicilerin sınaşmasına, lääzım bu dudurmu diiştirsin, söledi Gagauziya üüretim bakanı Nataliya Kristeva: «Ona lääzım birisi, kim ona nasaat verecek, kim praktikada gösterecek, ne yapmaa. Büünkü gün başladı çalışmaa bu programa. Milli uurda üüredicilär hazırlanȇrlar, angıları okullara gidip, gençleri üüredeceklär da olaceklar genç uzmannara dayak. Bundan kaarä bu programa taa başlamadıynan, avtonomiyada vardı bölä insannar. Onnar becerekli üüredicilär, angıları havezlän hem parasız yardım ederlär genç kolegalarına».
Komrat kasabasının Dmitriy Karaçobanın adına liţeya geldi 4 genç uzman. Da herkezindä var yardımcı, angısı gözleder onnarın işini, haberledi kurumun başı Mariya Angelova: «Onnar var nasıl danışsınnar herbir üürediciya yardım için. Neredä var zamandaş tehnologiyalar, orada gençlär yardım ederlär becerekli üüredicilerä, onnar da kendi sırasında paylaşȇrlar kendi bilgilerinnän gençlärlän. Neredä nasaat vererlär, ne türlü hem nicä yapmaa. Bunun için sayȇrım, ani var barabar çalışmak».
Gagauziya üüretim bakannıkta 4-cü yıl işleer genç üüredicilerin, terbiedicilerin hem menedjerların okulu. Orada savaşȇrlar tutturmaa genç uzmannarı, söledi Nataliya Kristeva: «Bu milli programa. Ona görä mentorlar hazırlanȇrlar diil sade genç üüredicilär için. Ama herkezi için, kimä yardım lääzm. Büünkü gün üüretim ileri gitti, onuştan onnara da kimdä var büük beceriklik iştä, onnara da yardım lääzım olȇr. Bu okul yardımcı olacek hepsi üüredicilär için».
Programa genç üüredicilerin profesional urunda tutturmasınnan baalı üüredicilä ilk yılın süresindä yardım yeder. Onnara verilecek metodika hem psihologiya ders hazırlamasında yardımı üürenicilerin bilgi notalamasında, ana- bobaların hem koleglarlan barabar işlemesindä yardımı, haberledi genç üüredicilerin okul başı Larisa Boykova: «Herbir okul bölä kişileri ayırȇr, bu üüredicilär çok işlenilmiş yıllarlan, angıları yardımcı olȇrlar genç üüredicilerä okul kolektivdä sınaşmaa, yardım ederlär annamaa okul dokumentlerini. Bu diil sade yardımcı, konsultant, o yardım eder genç üüredici kabletsin becermekleri kendi zanaatında hem sevsin uşakları hem kendi zanaatını».
Genç hem becerekli üüredicilär katılabileceklär türlü treniglara, ne verecek kolaylık kazanmaa profesional uurunda bilgileri hem geliştirmää üüretim sferasını. Proekti yaşamaya çıkarȇr devlet arası partnörlar, hem da o doorudulu ona, ki Moldovanın herbir okulun olsun becerekli hem kaavi üüredicilär.