Tarif tabiat gazına deyni Moldova devletindä var nasıl üüselsin.  «Energocom» isteer tarıfı gaz için sayıda 26,24 ley bir kubometra gaz için, ne yakın 30%taa zeedä büünkü paradan.

 

Akţioner bölümü «Energocom» nışannȇȇr, ani paa gaza kararlanacek sade ondan sora, nicä ȇnergetika uurunda  Milli agentstvosu (ANRE) bakacek dokumentleri hem da sayıları,  verilmiş kompaniyalan. Danışmak verildi o üzerä, ani paa  gaza büüdü Evropa  panayırında. 

                                           

«Energocom» kurumu

“Energocom” kurumunda annadȇrlar, neylän baalı gazın  tarifin üüselmesi. Neçinki  üüseldi gazın paası Evropa  panayırında. Kompaniyada açıklȇȇrlar, ani zamandaş tarif şindän sora örtämeer harçları satın almak için gazı, onun için da danıştı  “NARȆ” Energetika uurunda Milli Agentstvosuna  cümläylän, enidän bakılsın paa. Bunda “Energocom” kompaniyası çizgiler: laf gider sade tarif için, bitki kararı sa kabledecek  “NARȆ” Energetika uurunda Milli Agentstvosu,  ondan sora, nicä bakılaceklar verilmiş sayılar.”

Avtonomiyanın yaşayannarı pay oldular, nicä onnar plannȇȇrlar yısıtmaa kendi evlerini kış zamanında hem da enseyabileceklär mi ödemää deyni harçları, erli  üüselärsäydi paa tabiat gazına. 

1. «Kesecez kendi fidannarımızı,  neçinki çıkmayacez bu durumdan: gaz için hem da odun için lääzım para. Ne yapmaa? Zor, umutlanȇrım, ani kimsa  sınır aşırı devletlerdän yardımcı olacek.  Oolum Franţiyada. Erli yardım edärsäydi, saa olsun».

2. «Biz yısınȇrız gazlan. Bıldır da taa kolaydı, bu yıl hiç bilmeerim, nesoy olacek. Kocam açan yaşardı, biz ikimiz yaşardık, iki pensiya paralarına. O öldü. Bän bilmeerim, nicä yısınacam 3 bin leylän».

3. «Bän yısınȇrım odunnan. Bendä evdä soba var, da yakacam  onu.  Odun satın alacez, ne yapmaa?Gazlan yısınmȇȇrız, sade imää yapȇrız. Bölä sa —  odun, soba, batareya, heredä yısınȇr».

4. «Benim pensiya param pek islä, yısınacam gazlan. Elbetki, aartıracam. Ama kimdä pensiya parası küçük, odunnar da paalı — bilmeerim ne olacek».

5. «Konvektorlan hem da odunnan. Üç kub odun satın aldım, ama onnar etişeceklär.  Kömürlän yısınamȇȇrız, neçinki soba kötü halda bulunȇr. Onun için, sade odunnan yısınȇrız».

6. «Evi yısıdȇrız kömürlän hem da odunnan, gaz  hiç kullanmȇȇrız yısınmak için. Kış için odun hem kömür hazırladınız mı? Elbetki, taa ilkyazdan hazırladım».

7. «Pek zor. Pek zor. Neylän yısınȇrsınız kışın? Ȇlektrik plitkasınnan, neçinki yok neylän ödeyım gazı. Yaşȇȇrım yalnız, 1800 ley pensiyam. Hiç bişeya etişmeer».

8. «Tezeklän isınȇrız, ne yapmaa? Var soba da, var yısıtmak sisteması da gazlan. Pensiya 2, 5 bin ley kurȇr. Neya bu para etişeecek. Hazırladınız mı  tezekleri  kış için?Tezek hazırladım taa ilkyazdan beeri».

9. «Benim pensiya param kurȇr 2,5 bin ley. Lääzım ödemää harşları, bu — suyu da, şafkı da, satın lääzım ilaç da alayım, imää da lääzım. Pek zor.  Bendä soba yok. Gazlan bu yıl diil lääzım yısınma. Nesoy çıkışı görersiniz bu durumdan? Sade taa sıcak giinmää, da oturmaa. Nekadar daaynacez, okadar da dayanacez».

10. «Biz elbetki yısınȇrız  gazlan, nicä her zaman. Ama bölä paada bilmeerim, ne yapacez. Erli devlet düşünärsäydi  kendi vatandaşları için, ozaman lääzım bakılsınnar nesoy sa ölçülär, yada 50% taa az ödemää  kış zamanında, yaşayannar çıksınnar deyni bu durumdan».

Soruş, gazın  tarifin üüselmesi için bakılȇr o üzerä, ani Moldova devletindä giriştirildi Hatalı durum ȇnergetika hem da su sferasında  60 günä kadar. Bu rejim lääzım versin kolaylık öndercilerä,  nekadar taa hızlı kabletsinnär deyni  lääzımnı ölçüleri,  ȇnergetika sferasında korkunçsuzluu için.