Master — klasslar çekedän muzikacılar için hem konţert merkezin meydanında.  Moldovanın anılmış rok — gruppası  «Gândul Mâței» nışannȇȇr kendi  yaradıcı  uurunda 30 — du yıldönümünü. Yıldönümün turun süresindä mızıkacılar bulundular Komrat kasabasında, Moldova devletin Kultura Ministerliin yardımınnan.  

30 yıl sţenada, birkaç evlat boyların sevenneri. «Gândul Mâței» grupası nışannadı yıldönümünü Komratta. Yortulu programanın süresindä genç mızıkacılar için geçirdilär master — klassları. Lafettillär  diil sade muzika için, ama onun için da, nicä korumaa gençlerin intereslerini  alezdän sesä.

SERGEY YAROVOY grupanın gitaristi

«Her zaman islä duygular,  açan nesoysa çocuk yada kız elinä alȇr gitarayı, da çekeder  gitmää benim yolumdan. Bu   istoriya, da bunnarı pek meraklı gözletmää».

Çizgilemää deyni becermekleri moldovadakı rokun mȇtrolarında  geldilär, nicä genç çalgıcılar, ölä da onnarın üüredicileri.

ÜLİYA AZİMOVA uşakların yaradıcı evin üüredicisi gitara klasında

«Pek canım acȇr, ani bän az tanışȇrım bu grupanın yaratmasınnan, ama master — klas sa   geçti pek  islä.  Bän teklif ettim kendi üürenicilerimi, da sanȇrım, ani onnarda kaldılar  büük duygular».

 Aleksandr geldi Çimişliyadan gitaristlerin grupasınnan.O çoktan «Gândul Mâței»  grupanın fanatı, da şindi biler  gitara oyunun  inceliini.  

ALEKSANDR ÇEBANU grupanın seveni

«Lääzım her zaman üürenmää, zanaatlanmaa hem da brakmamaa gitarayı. Pek sıcaktı buluşmak, mızıkacılar cevap ettillär hepsi bizim soruşlarımıza».

Sade cevap etmedilär, ama barabar patredä da çıktılar. Hem da nicä selfisiz.  Herbiri istedi  yanaşık olsun moldovadakı rokun legendalarınnan. Dobacı — bu o insan, kim  kullanȇr vakıdı, sayȇr grupanın dobacısı EVGENİY BERDÄ. O gösterdi, nicä ritmanın diişilmesi  var nasıl diiştirsin kompoziţiyanın ötmesini.


EVGENİY BERDÄ grupanın dobacısı

«Biz var nasıl biraz diiştirelim ritmayı sayılan, da birdän olȇr başka ötmäk bu meraklı opıt. Zamandaşta bizi dolaylȇȇr informaţiya telefonardan, gadjetlardan, ama bulmaa deyni ne seni alezdän meraklandırȇr  — pek kolay».

Praktikadan sora, primariyada geçti press — konferenţiya. Bu kultura olayın kurulmasını tutturdular  erli kuvetlär. 

SERGEY ANASTASOV Komrat kasabasının primarı 
  

«Pek önemni giriştirmää  kulturayı, may alez açan laf gider bizim genç yaradıcılarımız için. Komrat kasabasının primarıyası sıkça kurȇr toplantıları, angılarında pay alȇrlar rok — gruppalar».

30 yılın süresindä  «Gândul Mâței» grupası kurdu kendi unikal stilini. Kurucular çizgileerlär — bölä vizitlerin baş neeti — toplamaa bireri insannarı muzikanın yardımınnan.

İOANA İSAK grupanın rejisöru

«Bizim baş missiyamız — toplamaa hepsini, ne baalı barabar paalılıklarlan, alez  hem avtor muzikasınnan. «Gândul Mâței» grupasında var kendi unikal muzika hem kultura yazısı, da büün biz isteeriz pay olmaa onunnan sizinnän».

30 yılın süresindä diiştilär sţenalar, auditoriya, ama alezdän muzikaya  meraklık kalȇr. «Gândul Mâței» grupanın çalgıcısı NİKU ŢȆRNȆ ayırı nışannadı kultura diişilmeklerin önemniini regionnarın aralarında.

NİKU ŢȆRNȆ grupanın çalgıcısı 

«Bän kendim tanıştım Çadır — Lunga kasabasının teatrusunnan  — bu benim kolegalarım, neçinki bän kendim aktörum hem da teatrunun öndercisi Kişinöv kasabasında. Bana pek meraklı, ne orada şindi koyulȇr.  Yollȇȇrım seläm Mihail Konstantinova hem Mihail Gagauza — biz dosttuz.  İsteerim  taa zedä lafedelim deyni, neçinki bitki vakıtlar bizim toplumumuz biraz bu taraftan yufkaladı».

Yortunun kulminaţiyası oldu «Gândul Mâței» yıldönümü konţerti Komrat kasabasının meydanında. Gruppa çaldı kendi baş hitlarını. 

Полина Барбова, Екатерина Манита,  Иван Кара, Вячеслав  Кысса, Алексей  Герчу GRT “Haberlär”.