Gagauziyada plannanȇr genişletmää gagauz dilin üürenmesini, istoryayı hem kulturayı avtonomiyanın hepsi üürenmäk kurumnarında — bakmadaan, angı dildä uşaklar üürenerlär. İniţiativa doorudulu ona, ki hepsi üürenicilerin olsun kolaylıkları tanışmaa gagauz dilinnän hem da adetlerinnän.
Gagauziya Baş üüretmäk bakanı Nataliya Kristeva nışannadı, ani bu önemni enilik gigi oldu rumın dilindä çalışan liţeya. Onun laflarına görä bu üürenmäk okullarında var uşaklar, angıların şindiyadan oktu kolaylıkları üürenmää kendi ana dilini hem da kendi halkın istoriyasını. Eni derslär vereceklär kolaylık geeri bunu çevirmää, çizgiledi Gagauziya Baş üüretmäk bakanı Nataliya Kristeva: «Büün Gagauziya liţeylerdä rumın dilindä üürenmesinnän — 80 % zeedä uşak — gagauz . Büün onnarda yok kolaylık üürensinnär kendi ana dilini. Gagauziya kanonuna görä lääzım taa derindän üürenmäk, nicä liţeylerdä rumın dilin üürenmesinnän, ölä da rus dilindä üürenmesinnän».
Moldova devletin Üüretmäk herm da Aaraştırmak Ministrusu Dan Perçun çizgiledi, ani Ministerlik tütturdȇr gagauz dilin üürenmesini hem da meraklanȇr, ki bu proţes geçsin üüsek uurda. Ministrunun laflarına görä, başarlar var nasıl olsunnar sade, açan hepsi cevaplı strukturlar barabar işleyeceklär, hazırlamaa deyni kaliteli programaları, materialları hem koşulları üürenmäk için.
«Biz hep okadar burada lafederiz 4 okul için, sade dördü için, neredä o yok. Bu 5% uşak. Yapalım hepsi koşulları, ki onnar istesinnär üürenmää gagauz dilini, ki bizdä olsunnar hepsi materiallar, hazırlanmış üüredicilärlän, ki bizdä olsun en islä, en üüsek üüretmäk proţesi. Da diil sade bu 4 okulda , ama Gagauzyanın hepsi okullarında»,- Dan Perçun çizgiledi.
Üüremäk kurumnarın temsilcileri inandırȇrlar, ani gagauz dilin üürenmesi avtonomiyada bulunȇr islä uurda, ama karşı geler üürenmäk materialların etişmemezlinnän. Üüredicilär çizgileerlär, ani önemni profil strukturalarınnan barabar kurmaa eni programaları, kiyatları hem da resursları, angılaırna görä olacek kolaylık predmeti üüretmää kaliteli.
«İslä olacek, erli biz düşünärsäydik materiallar için üürenicilerä. Ko olsunnar tematik mini — sözlüklär, nesoysa üürenmäk posobiyaları üürenicilär için. Neçinki üüredici derstä verer çok, sade nicä döner geeri evä — bişey yok».
« İsteniler, baza olsun deyni, bütündän fon, neçinki gagauz dili üüredicileri kurȇrlar bunnarı kendileri, onnar çevirerlär rus dilindän, rumın hem da ȇngiz dillerindän. Bizdä hazır material yok».
Getirecez aklılarınıza, ani kasım ayın 3 — dä GHT deputatlarının kabledildi Üüretmäk kanonu Gagauziya için, angısına görä, avtonomiyanın hepsi üürenmäk kurumnarında lääzım olacek maasuz üürenilsin gagauz dili, gagauz halkın istoryası hem da kulturası.